| B U S I N E S S D E S K |

സി കെ ശ്രീജിത്ത്
സ്‌പോർട്ടി വാഹനങ്ങളുടെ ശ്രേണിയിൽ പുതു ചലനമുണ്ടാക്കിയ മഹിന്ദ്ര ഥാർന്റെ പുതിയ പതിപ്പ് നിരത്തുകളിൽ വമ്പൻ ഹിറ്റായി. സമീപകാലത്തൊന്നും വിപണിയിൽ ഇത്ര വലിയ ചലനം ഒരു വണ്ടിയും ഉണ്ടാക്കിയിട്ടില്ല എന്നിരിക്കെ സൂപ്പർ വമ്പന്റെ വില ഉയർത്താൻ തന്നെ കമ്പനി തീരുമാനിച്ചു.

അവതരിപ്പിച്ച് ഒരു മാസത്തി നുള്ളിൽ ബുക്കിങ്, കമ്പനിക്ക് താങ്ങാൻ പറ്റാത്ത അവസ്ഥയിൽ 20000 കവിഞ്ഞതോടെ മഹിന്ദ്രക്ക് കാര്യം പിടികിട്ടി.വില എത്ര ഉയർത്തിയാലും ഥാറിന്റെ പിന്നാലെ ഓടാൻ ആളുകൾ ഉണ്ടെന്ന്.ഉയർന്ന വില ഇന്ന് മുതൽ പ്രാബല്യത്തിൽ വരുമെങ്കിലും നിലവിൽ ബുക്കിംഗ് ഉള്ളവർക്ക് പഴയ വിലയിൽ വണ്ടി ലഭിക്കും.
ഒക്ടോബർ 2 നാണ് വാഹന പ്രിയന്മാരെ ഞെട്ടിച്ചുകൊണ്ട് ഥാറിന്റെ പുതിയ പതിപ്പ് മഹിന്ദ്ര അവതരിപ്പിച്ചത്.പഴയ വണ്ടിയിൽ ചെറിയ പരിഷ്‌കാരങ്ങൾ മാത്രം പ്രതീക്ഷിച്ച ആരാധകർ ഒരുവേള അമ്പരന്നു പോയി എന്നുതന്നെ പറയാം.വർണ്ണിക്കാൻ ആവാത്തത്ര മനോഹരമാ യിരുന്നു അവന്റെ തലയെടുപ്പ്.ഏതോ സ്വപ്നലോകത്തിലാണോ എന്നുതോന്നിപ്പിക്കുമാറ് ഭംഗി.സ്പോർട്ട്സ് യൂട്ടിലിറ്റി ലൂക്കിനൊപ്പം ആഡംബര കാറിന്റെ ഓമനത്തവും കൂടിയ മിക്സഡ് ഭംഗി വിപ്ലവമായിരുന്നു പുതിയ ഥാർ.

09.80 ലക്ഷത്തിൽ തുടങ്ങി 13.75 ലക്ഷം രൂപയിൽ അവസാനിക്കുന്ന വാരിയന്റിലായിരുന്നു ആദ്യ വില.നിരത്തിൽ താരമായതോടെ പഴയ വാരിയന്റിലുള്ള വിലനിലവാരം ഉൾക്കൊള്ളുന്ന വണ്ടിയുടെ ചിത്രങ്ങളും മറ്റും മഹീന്ദ്രയുടെ വെബ്സൈറ്റിൽ നിന്ന് നീക്കിയിരുന്നു. അപ്പോഴേ വില പരിഷ്കരണം എന്ന മണം പരന്നിരുന്നു.പേടിച്ചത് തന്നെ സംഭവിച്ചു.പുതുക്കിയ വില ഡിസംബർ ഒന്ന് മുതൽ പ്രാബല്യത്തിലായി 11.90 ഉം 13.75 ലക്ഷവുമാണ് പുതുക്കിയ വില.
ബുക്ക് ചെയ്ത് ഏഴ് മാസം വരെയുള്ള കാത്തിരിപ്പ് അസഹനീയമാണെന്ന ആരാധകരുടെ അഭിപ്രായം മാനിച്ച് മഹിന്ദ്ര പ്രതിമാസ ഉൽപ്പാദനം 2000 ൽ നിന്ന് 3000 ആകുമെന്ന് അറിയിച്ചിട്ടുണ്ട്. സുരക്ഷ പരിശോധനയായ എൻ-ക്യാപ് ക്റാഷ് ടെസ്റ്റിൽ ഫോർ സ്റ്റാർ റേറ്റിംഗ് കൂടി ലഭിച്ചതോടെ ഇന്ത്യയിലെ ഏറ്റവും മികച്ച ഓഫ് റോഡ് വാഹനമെന്ന ബഹുമതിയുംലഭിച്ചു.
2.0 ലിറ്റർ എംസ്റ്റാലിൻ പെട്രോൾ,2.2 ലിറ്റർ ഏംഹോക്ക് ഡീസൽ എന്നിങ്ങനെയാണ് എൻജിൻ.പെട്രോളിന് 150 ബി എച് പി പവറും 320 എൻ എം ടോർക്കും,ഡീസലിന് 130 ബി എച് പി പവറും 300 എൻ എം ടോർക്കും ലഭിക്കും.മാനുവൽ വാരിയന്റിനൊപ്പം സിക്സ് സ്പീഡ് ഓട്ടോ ട്രാൻസ്മിഷനിലും ഥാർ ആരാധകർക്കായി മഹിന്ദ്ര ഒരുക്കിയിട്ടുണ്ട്.

photo courtesy: motoroids.com

ഷാര്‍ജ: യുഎഇയിലെ വിനോദ സഞ്ചാര കേന്ദ്രങ്ങള്‍ തണുപ്പുകാലമെത്തിയതോടെ വീണ്ടും സജീവമാവുന്നു. കോവിഡ്19 നിയന്ത്രണങ്ങള്‍ പാലിച്ചുകൊണ്ടു ക്യാംപുകളും റോഡ് ട്രിപ്പുകളുമെല്ലാം മുന്‍കാലങ്ങളിലെന്ന പോലെ സജീവമായിരിക്കുന്നു. അനുകൂലമായ കാലാവസ്ഥയെത്തിയതോടെ സംഘം ചേര്‍ന്നുള്ള സാഹസിക യാത്രകളും ട്രെക്കിങ്ങും വീക്കെന്‍ഡുകളുടെ ഭാഗമായിത്തുടങ്ങിയിട്ടുണ്ട്.

ഇത്തരത്തില്‍ സാഹസികത ഇഷ്ടപ്പെടുന്ന, മലനിരകള്‍ കീഴടക്കാനും കുന്നിന്‍മുകളിലെ കാഴ്ചകള്‍ കാണാനുമിറങ്ങുന്ന സഞ്ചാരികള്‍ക്ക് പുതിയൊരു യാത്രാനുഭവം ഒരുക്കുകയാണ് ഷാര്‍ജയിലെ മെലീഹ ആര്‍ക്കിയോളജിക്കല്‍ സെന്റര്‍. ജബല്‍ ബുഹൈസ് മലനിരകളിലൂടെ ചരിത്രകാഴ്ചകളും തേടിയുള്ള ട്രക്കിങ്ങാണ് പുതിയ വിശേഷം. ശാരീരികക്ഷമത വര്‍ധിപ്പിക്കുന്നതോടൊപ്പം മേഖലയിലെ പുരാവസ്തുശേഷിപ്പുകള്‍ അടുത്തുകാണാനുള്ള അപൂര്‍വ അവസരമാണ് ജബല്‍ ബുഹൈസ് ട്രക്കിങ്

മെലീഹ പ്രദേശത്തു നിന്ന് കണ്ടെടുത്ത നൂറ്റാണ്ടുകള്‍ പഴക്കമുള്ള ശവകൂടീരങ്ങള്‍ സന്ദര്‍ശിച്ചാണ് ഒരു മണിക്കൂര്‍ ദൈര്‍ഘ്യമുള്ള ട്രെക്കിങ്ങ് ആരംഭിക്കുന്നത്. തുടര്‍ന്ന് മലനിരകള്‍ക്കിടയിലൂടെ കാഴ്ചകളുമാസ്വദിച്ചുള്ള നടത്തമാരംഭിക്കും. രണ്ടായിരം വര്‍ഷം പഴക്കമുള്ള, ഇരുമ്പുയുഗത്തില്‍ നിര്‍മിച്ച കോട്ടയിലാണ് ഈ സഞ്ചാരമവസാനിക്കുക.

യാത്രയിലുടനീളം കാഴ്ചകളും ചരിത്രവും വിവരിക്കാനും സഹായിക്കാനുമായി ഗൈഡിന്റെ സേവനമുണ്ടാവും. പുരാവസ്തു മ്യൂസിയം സന്ദര്‍ശിക്കുകയും ചെയ്യാം. 200 ദിര്‍ഹമാണ് മുതിര്‍ന്നവര്‍ക്കുള്ള നിരക്ക്. കുട്ടികള്‍ക്ക് 100 ദിര്‍ഹം. പത്തു വയസിനു മുകളിലുള്ളവര്‍ക്ക് ട്രക്കിങ്ങിന്റെ ഭാഗമാവാം. രണ്ടു പേര്‍ മുതല്‍ ആറു പേര്‍ വരെയുള്ള സംഘങ്ങളായി ബുക്ക് ചെയ്യാനുള്ള സൗകര്യമുണ്ട്.

കൊറോണ ഇളവുകള്‍ അനുവദിച്ചതിന് ശേഷം നാടെങ്ങും എല്ലാവരും ടൂറിലാണ്. എന്നാല്‍ ഇനി മൂന്നാറിലെത്തുന്ന ടൂറിസ്റ്റുകളെ കാത്തിരിക്കുന്നത് മറ്റൊരു സര്‍പ്രൈസ് ആണ്. ഇനി മൂന്നാാറിലെത്തുന്ന വിനോദ സഞ്ചാരികള്‍ക്ക് ആനവണ്ടിയില്‍ രാപാര്‍ക്കാം. ഇതിനായി മൂന്നാര്‍ ബസ് സ്റ്റേഷന്‍ പരിസരത്ത് സ്ഥാപിച്ചിരിക്കുന്ന സ്ലീപ്പര്‍ ബസുകള്‍ സഞ്ചാരികള്‍ക്ക് വാടകക്ക് നല്‍കുന്നത് സംബന്ധിച്ചുള്ള നിരക്കും മാര്‍ഗ നിര്‍ദ്ദേശങ്ങളും പുറത്തിറക്കി.

സ്ലീപ്പര്‍ ഒന്നിന് ഒരു രാത്രി 100 രൂപ നിരക്കില്‍ വൈകിട്ട് 6 മണിമുതല്‍ പിറ്റേന്ന് ഉച്ചക്ക് 12 മണിവരെ വാടകയ്ക്ക് നല്‍കും. വാടകക്ക് തുല്യമായ തുക കരുതല്‍ ധനമായി നല്‍കണം. ഒഴിഞ്ഞ് പോകുമ്പോള്‍ നാശനഷ്ടങ്ങള്‍ വല്ലതുമുണ്ടെങ്കില്‍ അത് ഈടാക്കിയ ശേഷം ബാക്കി തുക തിരികെ നല്‍കാം. ട്രെയിനുകളിലെ സ്ലീപ്പര്‍ കോച്ച് മാതൃകയില്‍ ഒരാള്‍ക്കു മാത്രം കിടക്കാവുന്ന കംപാര്‍ട്മെന്റുകള്‍ ബസില്‍ സജ്ജമാക്കും. കിടക്കയും മൊബൈല്‍ ചാര്‍ജിങ് പോര്‍ട്ടും ഉള്‍പ്പെടെയുള്ള സൗകര്യങ്ങളുണ്ടാകും.

ബസ് ഉപയോഗിക്കുന്നവര്‍ക്ക് നിലവില്‍ മൂന്നാര്‍ ഡിപ്പോയില്‍ ഉള്ള ടോയ്‌ലറ്റ് സൗകര്യം ഉപയോഗിക്കാനായി അനുവദിക്കും. സ്ത്രീകള്‍ക്കും പുരുഷന്‍മാര്‍ക്കും പ്രത്യേകം പ്രത്യേകമായുള്ള ടോയിലറ്റുകളാണ് അനുവദിക്കുക. ഇതിനായി ടോയിലറ്റുകള്‍ നവീകരിച്ചു കഴിഞ്ഞു. ഓരോ ഗ്രൂപ്പും മാറുന്നതിന് അനുസരിച്ച് ബസ് വൃത്തിയാക്കി അണു നശീകരണം നടത്തി വേണം അടുത്ത ഗ്രൂപ്പിന് നല്‍കേണ്ടത്.

വൃത്തിയാക്കുന്നതിനും, താമസിക്കുന്നവര്‍ക്ക് പുറമെ നിന്നും ഭക്ഷണം വാങ്ങി കൊടുക്കുന്നതിനും, ലഗേജ് വാഹനത്തില്‍ എടുത്ത് വെക്കുന്നതിനും വേണ്ടി രണ്ട് ക്യാഷല്‍ ജീവനക്കാരെ നിയമിക്കും. കെ.എസ്.ആര്‍.ടി.സിയുടെ 9447813851, 04865230201 ഫോണ്‍ നമ്പര്‍ വഴി ബുക്ക് ചെയ്യാം. ഇത് കൂടാതെ ബുക്കിംഗ് ഏജന്റുമാരെ 10% കമ്മീഷന്‍ വ്യവസ്ഥയില്‍ അനുവദിക്കും.

തെന്മല : ശെന്തുരുണി ഇക്കോടൂറിസത്തില്‍ സഞ്ചാരികള്‍ക്ക് ഇന്ന് മുതല്‍ പ്രവേശനം അനുമതി. കൊറോണ വൈറസ് മാനദണ്ഡങ്ങള്‍ പാലിച്ചുകൊണ്ട് ഇക്കോടൂറിസം കേന്ദ്രങ്ങള്‍ പ്രവര്‍ത്തിക്കാന്‍ സര്‍ക്കാര്‍ അനുമതി നല്‍കിയ പശ്ചാത്തലത്തിലാണ് ഇന്ന് ശെന്തുരുണി ഇക്കോടൂറിസവും തുറക്കുന്നത്.

കഴിഞ്ഞ തിങ്കളാഴ്ച തുറക്കുമെന്ന് അറിയിച്ചിരുന്നെങ്കിലും തീയതി മാറ്റുകയായിരുന്നു. ബോട്ടിങ്, കുട്ടവഞ്ചി, മുളച്ചങ്ങാടം, ജീപ്പ് സവാരി,ട്രെക്കിങ്, ക്യാമ്പിങ് എന്നിവയാണ് പുനരാരംഭിക്കുന്നത്. ഓണ്‍ലൈന്‍ മുഖേന സഞ്ചാരികള്‍ക്ക് ബുക്ക് ചെയ്യാവുന്നതാണ്. ഓണ്‍ലൈന്‍വഴി മാത്രമായിരിക്കും പണമിടപാട് നടത്തുന്നത്. 10-നുതാഴെയും 60-നുമുകളിലും പ്രായമുള്ളവര്‍ക്ക് പ്രവേശനം അനുവദിക്കില്ല. സാമൂഹിക അകലം പാലിക്കുന്നതിനുള്ള ക്രമീകരണങ്ങള്‍ ഏര്‍പ്പെടുത്തിയിട്ടുണ്ട്.

ശുചീകരണപ്രവര്‍ത്തനങ്ങള്‍ പൂര്‍ത്തിയായി. കൂടുതല്‍ വിവരങ്ങള്‍ക്ക് 0475-2344100, 8547567935 എന്നീ നമ്പരുകളില്‍ ബന്ധപ്പെടണമെന്ന് വന്യജീവിസങ്കേതം അസി. വൈല്‍ഡ് ലൈഫ് വാര്‍ഡന്‍ സജു ടി.എസ്. അറിയിച്ചു.

വെള്ളമുണ്ട: കോവിഡ് നിയന്ത്രണങ്ങളെ തുടര്‍ന്ന് അടച്ച ബാണാസുര സാഗര്‍ വീണ്ടും തുറന്നതോടെ സഞ്ചാരികള്‍ എത്തിത്തുടങ്ങി. ടൂറിസം മേഖലയും ഉണര്‍ന്നു.

ഏഴുമാസത്തെ ഇടവേളക്കുശേഷം വ്യാഴാഴ്ചയാണ് സഞ്ചാരികള്‍ക്കായി തുറന്നുകൊടുത്തത്. ആദ്യ ദിവസം 187 വിനോദ സഞ്ചാരികള്‍ എത്തിയതായി ഹൈഡല്‍ ടൂറിസം വകുപ്പ് അധികൃതര്‍ പറഞ്ഞു. വെള്ളിയാഴ്ചയും ഇരുന്നൂറിനടുത്ത് സഞ്ചാരികള്‍ അണക്കെട്ട് കാണാനെത്തി.

സഞ്ചാരികളില്‍ ഏറെയും സമീപ ജില്ലകളില്‍ നിന്നുള്ളവരാണ്. വരുംദിവസങ്ങളില്‍ സഞ്ചാരികളുടെ എണ്ണത്തില്‍ വര്‍ധനയുണ്ടാകുമെന്ന പ്രതീക്ഷയിലാണ് അധികൃതര്‍.

ഡി.ടി.പി.സിക്കു കീഴിലുള്ള വിനോദ കേന്ദ്രങ്ങള്‍ തുറക്കാന്‍ വൈകുന്നതും ബാണാസുരയിലേക്ക് കൂടുതല്‍ സഞ്ചാരികളെത്തുന്നതിന് കാരണമാകും. നിലവില്‍ ബോട്ട് സര്‍വിസും ഡാം സന്ദര്‍ശനവും മാത്രമാണ് അനുവദിക്കുന്നത്. സ്വിപലൈന്‍, ഹൊറര്‍ തിയറ്റര്‍ എന്നിവ വരുംദിവസങ്ങളില്‍ പ്രവര്‍ത്തനസജ്ജമാകും.

പൂര്‍ണമായി കോവിഡ് പ്രോട്ടോകോള്‍ പാലിച്ചാണ് സഞ്ചാരികളെ പ്രവേശിപ്പിക്കുന്നത്. സഞ്ചാരികള്‍ എത്തിയതോടെ സമീപത്തെ ഹോട്ടലുകളിലും റിസോര്‍ട്ടുകളിലും കച്ചവട സ്ഥാപനങ്ങളിലും നേരിയ തിരക്കനുഭവപ്പെടുന്നുണ്ട്. ബോട്ടിങ് സര്‍വിസിനോടാണ് ആളുകള്‍ക്ക് പ്രിയം. 16 ബോട്ട് സര്‍വിസ് ഒരുക്കിയിട്ടുണ്ട്. മറ്റ് കേന്ദ്രങ്ങളും പതിയെ ഉണരുമെന്ന പ്രതീക്ഷയിലാണ് അധികൃതര്‍.

തിരുവനന്തപുരം: സംസ്ഥാനത്ത് ബീച്ചുകള്‍ ഒഴികെയുള്ള വിനോദസഞ്ചാര കേന്ദ്രങ്ങള്‍ ഇന്നു തുറക്കും. കോവിഡ് മാനദണ്ഡങ്ങള്‍ നിര്‍ബന്ധമായും പാലിക്കണം. ബീച്ചുകള്‍ നവംബര്‍ ഒന്ന് മുതലാണ് തുറക്കുക. ഇക്കാര്യം ടൂറിസം മന്ത്രി കടകംപള്ളി സുരേന്ദ്രന്‍ അറിയിച്ചു.

സംസ്ഥാനത്തെ ടൂറിസം കേന്ദ്രങ്ങളിലേക്ക് കോവിഡ് മുന്‍കരുതലുകള്‍ കര്‍ശനമായി പാലിച്ചുകൊണ്ട് രണ്ട് ഘട്ടമായി പ്രവേശനത്തിന് അനുമതി നല്‍കുന്നതിനാണ് തീരുമാനമെടുത്തതെന്ന് മന്ത്രി പറഞ്ഞു. ഹില്‍ സ്റ്റേഷനുകള്‍, സാഹസിക വിനോദസഞ്ചാര കേന്ദ്രങ്ങള്‍, കായലോര ടൂറിസം കേന്ദ്രങ്ങള്‍ തുടങ്ങിയവയാണ് ഇന്നുമുതല്‍ സഞ്ചാരികള്‍ക്കായി തുറക്കുക.

ദുബായ് : കൂടുതല്‍ കാഴ്ചകളൊരുക്കി ദുബായ് സഫാരി തുറന്നു. 2018 മേയില്‍ നവീകരണ പ്രവര്‍ത്തനങ്ങള്‍ക്കായി അടച്ച സഫാരി വൈവിധ്യമാര്‍ന്ന വിദ്യാഭ്യാസ-ഉല്ലാസ പരിപാടികള്‍ ഉള്‍പ്പെടുത്തിയാണ് തുറന്നത്. ആഫ്രിക്കന്‍ കാടുകളില്‍ നിന്നടക്കം കൂടുതല്‍ മൃഗങ്ങളും എത്തി.

അല്‍വര്‍ഖ അഞ്ചില്‍ വെള്ളച്ചാട്ടങ്ങളും കുന്നുകളും കാടും മേടുമായി 119 ഹെക്ടറില്‍ വ്യാപിച്ചുകിടക്കുന്ന സഫാരിയില്‍ 3,000 മൃഗങ്ങളുണ്ട്. അപൂര്‍വയിനം പക്ഷികളെയും വംശനാശ ഭീഷണി നേരിടുന്ന മൃഗങ്ങളെയും കാണാം. രാവിലെ 9 മുതല്‍ വൈകിട്ട് 5 വരെയാണു പ്രവേശനം. ഓണ്‍ലൈനില്‍ ബുക്ക് ചെയ്യണം.

പത്തനംതിട്ട: ഏഴ് മാസത്തെ അടച്ചുപൂട്ടലിന് ശേഷം ഗവി വീണ്ടും വിനോദ സഞ്ചാരികള്‍ക്കായി തുറന്ന് കൊടുക്കുന്നു. കൊവിഡ് പശ്ചാത്തലത്തില്‍ കര്‍ശന നിയന്ത്രണങ്ങളോടെയാണ് തുറക്കുന്നത്. ഓണ്‍ലൈന്‍ വഴി ബുക്ക് ചെയ്യുന്നവര്‍ക്ക് മാത്രമാണ് പ്രവേശനം. മഞ്ഞ് മൂടിയ കാനനഭംഗിയും വഴിയോരത്തെ വന്യമൃഗങ്ങളുടെ സാന്നിദ്ധ്യവുമാണ് വിനോദസഞ്ചാരികളെ ഗവിയിലേക്ക് ആകര്‍ഷിക്കുന്നത്. പ്രത്യക കാലാവസ്ഥയും ട്രക്കിങ്ങും ബോട്ടിങ്ങും ആസ്വാദകരുടെ എണ്ണം കൂട്ടും.

പത്തനംതിട്ട ജില്ലാ ആസ്ഥാനത്ത് നിന്ന് നൂറ് കിലോമീറ്റര്‍ അകലെയുള്ള ഗവിയിലേക്ക് പ്രതിദിനം 300 ഓളം സഞ്ചാരികളാണ് ലോക്ഡൗണിന് മുമ്ബ് വരെ എത്തിയിരുന്നത്. കൊവിഡ് മാനദണ്ഡങ്ങളോടെ ഗവി വീണ്ടും തുറക്കുമ്‌ബോള്‍ സഞ്ചാരികള്‍ക്ക് വേണ്ടി നിയന്ത്രണങ്ങള്‍ ഏര്‍പ്പെടുത്തിയിട്ടുണ്ട്. പത്ത് വയസില്‍ താഴെയുള്ള കുട്ടികള്‍ക്കും 65 വയസിന് മുകളിലുള്ളവര്‍ക്കും പ്രവേശനമില്ല.

പ്രതിദിനം 30 വാഹനങ്ങള്‍ക്ക് മാത്രമാണ് അനുമതി. ജീപ്പിലും കാറിലും മാത്രമേ പ്രവേശിക്കാവു. ഒറ്റദിവസംകൊണ്ട് കാഴ്ചകള്‍ പൂര്‍ത്തിയാക്കി മടങ്ങണം. എന്നാല്‍ സഞ്ചാരികളെ ഗവിയില്‍ താമസിപ്പിക്കുന്ന ചൂറിസം പാക്കേജിന് കൂടി അനുമതി നല്‍കണമെന്നാണ് കേരള ഫോറസ്റ്റ് ഡെവലപ്പ്‌മെന്റ് കോര്‍പ്പറേഷന്റെ ആവശ്യം.

കൊല്ലം; സംസ്ഥാനത്ത് കോവിഡ് വ്യാപനം രൂക്ഷമാസ സാഹചര്യത്തില്‍ മഞ്ഞു വീഴ്ച കാണാന്‍ കൂട്ടമായി എത്തിയ ആയിരത്തോളം പേര്‍ക്കെതിരെ പൊലീസ് നടപടി എടുത്തു. കൊല്ലം അഞ്ചലില്‍ ചേറ്റുകുഴി പിനാക്കിള്‍ വ്യൂപോയിന്റില്‍ കാഴ്ചകാണാന്‍ കോവിഡ് മാനദണ്ഡം പാലിക്കാതെ കൂട്ടം കൂടിയവരില്‍ നിന്നാണ് പൊലീസ് പിഴ ഈടാക്കിയത്.

വാഹനങ്ങള്‍ക്കു 2000 രൂപ വീതവും വ്യക്തികള്‍ക്കു 200 വീതവും പിഴ അടപ്പിച്ചു. ഇന്നലെ രാവിലെ ആയിരത്തോളം പേരാണ് അര കിലോമീറ്റര്‍ സ്ഥലത്ത് ഇടുങ്ങിയ റോഡില്‍ കൂട്ടം ചേര്‍ന്നത്. ഉയരമേറിയ സ്ഥലത്തെ റബര്‍ തോട്ടത്തില്‍ നിന്നാല്‍ കാണുന്ന വിദൂര ദൃശ്യങ്ങളും മഞ്ഞു വീഴ്ചയും കാണാമെന്നതാണ് ആകര്‍ഷണം. ഒട്ടേറെ ആളുകള്‍ വാഹനങ്ങളില്‍ എത്തിയ വിവരം അറിഞ്ഞു പൊലീസ് എത്തിയതോടെ ചിലര്‍ സ്ഥലം വിടാന്‍ ശ്രമിച്ചെങ്കിലും ഇരുവശത്തും പൊലീസ് റോഡ് അടച്ചതിനാല്‍ എല്ലാവരെയും പിഴയീടാക്കി.

നീണ്ട 6 മാസങ്ങള്‍ക്കൊടുവില്‍ താജ്മഹല്‍ പ്രണയസൗധം സഞ്ചാരികള്‍ക്കായി തുറന്നു. കോവിഡ് വ്യാപനത്തെ തുടര്‍ന്ന് പൂട്ടുവീണതാണ് താജ്മഹല്‍ ഉള്‍പ്പെടെയുള്ള ഇന്ത്യയിലെ വിനോദ സഞ്ചാര കേന്ദ്രങ്ങള്‍. അണ്‍ലോക്ക് 4ന്റെ ഭാഗമായാണ് താജ്മഹലും ആഗ്ര കോട്ടയും അടക്കമുള്ള ഇന്ത്യയിലെ പ്രധാന വിനോദ സഞ്ചാര കേന്ദ്രങ്ങള്‍ സഞ്ചാരികള്‍ക്കായി തുറക്കുന്നത്.

ഒരു ദിവസം താജ്മഹലില്‍ 5000 പേരെയും ആഗ്ര കോട്ടയില്‍ 2500 പേരെയും മാത്രമേ സന്ദര്‍ശിക്കാന്‍ അനുവദിക്കൂ. സാമൂഹിക അകലം പാലിക്കല്‍, മാസ്‌ക് ധരിക്കുക, സാനിറ്റൈസര്‍ ഉപയോഗിക്കുക തുടങ്ങിയ കാര്യങ്ങള്‍ നിര്‍ബന്ധമായും പാലിക്കണം.

ടിക്കറ്റ് കൗണ്ടറുകളായിരിക്കില്ല, പകരം ഇലക്ട്രിക് ടിക്കറ്റുകളായിരിക്കും സന്ദര്‍ശകര്‍ക്ക് നല്‍കുക. കോവിഡ് വ്യാപനം രൂക്ഷമായതോടെ കഴിഞ്ഞ മാര്‍ച്ചില്‍ താജ്മഹല്‍ അടച്ചു. ഇതോടെ ഹോട്ടല്‍ മേഖലയും നഷ്ടത്തിലായി. ലോക്ക്ഡൗണ്‍ കണക്കിലെടുത്ത് ബഫര്‍ സോണിന്റെ ഭാഗമായി തരംതിരിച്ചിരിക്കുന്ന നഗരത്തിലെ എല്ലാ ചരിത്ര സ്മാരകങ്ങളും സെപ്തംബര്‍ 1 മുതല്‍ വിനോദ സഞ്ചാരികള്‍ക്കായി വീണ്ടും തുറക്കുമെന്ന് ആഗ്ര ജില്ലാ മജിസ്‌ട്രേറ്റ് പ്രഖ്യാപിച്ചെങ്കിലും താജ്മഹലും ആഗ്ര കോട്ടയും തുറന്നിരുന്നില്ല.

നമ്മുടെ ഭൂമിയില്‍ പലതരത്തിലുള്ള മനോഹരമായ ബീച്ചുകള്‍ ഉണ്ട്. നമ്മളൊക്കെ ബീച്ചില്‍ പോകുന്നത് എന്തിനാണ്? കടലിലിറങ്ങി കുളിക്കാനും തിരമാലകള്‍ക്കൊപ്പം കളിക്കാനുമൊക്കെ അല്ലേ. കുട്ടികള്‍ കൂടെയുണ്ടെങ്കില്‍ അവര്‍ക്കൊപ്പം മണലില്‍ ഇരുന്ന് കളിക്കുകയും ചെയ്യും അല്ലേ. എന്നാല്‍ ജപ്പാനിലുള്ള ഒരു കടല്‍ത്തീരത്തേക്ക് ആളുകള്‍ പോകുന്നത് അവിടുത്തെ മണലില്‍ കുളിക്കാനാണ്. അതെ തെക്കന്‍ ജപ്പാനിലെ ഇബുസുകി ബീച്ചിലെത്തിയാല്‍, നിങ്ങള്‍ക്ക് മണലില്‍ കുളിക്കാന്‍ കഴിയും.

300 വര്‍ഷത്തിലേറെയായി നിരവധിപേര്‍ ഇബുസുക്കി ബീച്ചില്‍ മണലില്‍ കുളിക്കാന്‍ എത്തുന്നു.വാതം, നടുവേദന, പോസ്റ്റ്-സ്‌ട്രോക്ക് പക്ഷാഘാതം, ഹെമറോയ്ഡുകള്‍, ആസ്ത്മ, പ്രമേഹം, ആര്‍ത്തവ സംബന്ധമായ അസുഖം, വന്ധ്യത, വിളര്‍ച്ച, മലബന്ധം, അമിതവണ്ണം തുടങ്ങി എല്ലാത്തരം രോഗങ്ങള്‍ക്കും മുക്തി തേടി ജപ്പാനീസുകാര്‍ ഇബുസുകിയുടെ തീരത്തേക്ക് യാത്ര ചെയ്യുന്നുണ്ട്.സുന-മുഷി എന്നാണ് ഈ ചികിത്സാരീതി അറിയപ്പെടുന്നത്. ഈ ബീച്ചിന് സമീപമുള്ള അഗ്‌നിപര്‍വതത്തിന്റെ പ്രവര്‍ത്തനത്താലാണ് കടല്‍ത്തീരത്തെ മണല്‍ കറുത്തതും ചൂടുള്ളതുമായി തീര്‍ന്നിരിക്കുന്നത്. ഈ ചൂടുള്ള മണലുകള്‍ രോഗശാന്തി നല്‍കും എന്നാണ് ഇവര്‍ വിശ്വസിക്കുന്നത്. അതുകൊണ്ട് തീരത്തെത്തി മണലില്‍ സ്വയം കുഴിച്ചിടാന്‍ അവര്‍ തയാറാകുന്നു.

തെക്കന്‍ ജപ്പാനിലെ ക്യുഷു ദ്വീപിലാണ് ഈ ബീച്ച്. ഈ പ്രദേശം അഗ്‌നിപര്‍വ്വത പ്രവര്‍ത്തനങ്ങള്‍ക്ക് പേരുകേട്ടതാണ്. മണല്‍ യഥാര്‍ത്ഥത്തില്‍ അഗ്‌നിപര്‍വ്വത പ്രവര്‍ത്തനങ്ങളാല്‍ ചൂടാക്കപ്പെടുന്നു, മണലിലെ ധാതുക്കളുടെ ഉയര്‍ന്ന സാന്ദ്രതയ്ക്ക് സമീപത്തുള്ള അഗ്‌നിപര്‍വ്വതങ്ങളോടാണ് നന്ദി പറയേണ്ടത്.ഈ സവിശേഷമായ ഇബുസുകിയുടെ സാന്‍ഡ് ബാത്ത് നിങ്ങള്‍ക്ക് പരീക്ഷിക്കാന്‍ കഴിയുന്ന നിരവധി സ്ഥലങ്ങള്‍ നഗരത്തിലുണ്ട്. ഈ കടല്‍ തീരത്ത് എത്തിയാല്‍ ആളുകളെ മണ്ണില്‍ കുഴിച്ചു മൂടിയിരിക്കുന്ന കാഴ്ചയായിരിക്കും കാണാന്‍ കഴിയുക. തല മാത്രം പുറത്താക്കി, ബാക്കി ശരീരഭാഗം മുഴുവന്‍ കറുത്ത മണ്ണ് കൊണ്ട് മൂടും. 10 മിനിറ്റ് മുതല്‍ 20 മിനിറ്റ് വരെയാണ് ഈ ചികിത്സാരീതിയുടെ സമയം.ജാപ്പനീസ് സ്പ്രിംഗ് ബാത്ത് ലോകപ്രസിദ്ധമാണ്. എന്നാല്‍ ചൂടുള്ള സ്പ്രിംഗ് ബാത്ത് കൂടാതെ, സ്വാഭാവികമായും ചൂടാക്കിയ ഈ തനതായ മണല്‍ കുളികള്‍ക്കും ഇബുസുകി പ്രശസ്തമാണ്.

അറ്റ്ലാന്റിക് സമുദ്രത്തിന്റെ തീരത്ത് അതിമനോഹരമായ ഒരു ദ്വീപ്. 3 നൂറ്റാണ്ടുകളായി ഇവിടേക്ക് പൊതുജനങ്ങളെ പ്രവേശിപ്പിച്ചിരുന്നില്ല. ഇപ്പോഴിതാ 300 വര്‍ഷത്തിന് ശേഷം ഇതാദ്യമായി ഇവിടേക്ക് ടൂറിസ്റ്റുകളെ ക്ഷണിച്ചിരിക്കുകയാണ്. യു.എസില്‍ മസാച്യുസെറ്റ്‌സിലെ കേപ് കോഡ് തീരത്തിന്റെ കിഴക്ക് സ്ഥിതി ചെയ്യുന്ന സിപ്‌സണ്‍ ഐലന്‍ഡ് ആണ് ദ്വീപ് സഞ്ചാരികള്‍ക്കായി തുറന്നു കൊടുത്തിരിക്കുകയാണ്. 1711 മുതല്‍ സ്വകാര്യ ഉടമസ്ഥതയിലായിരുന്നു ഈ ദ്വീപ്. ഇപ്പോള്‍ പുതിയ ട്രസ്റ്റും എന്‍.ജി.ഒകളും ചേര്‍ന്ന് ദ്വീപിനെ സ്വന്തമാക്കിയിരിക്കുകയാണ്. ഇവരാണ് ദ്വീപ് ഇനി പൊതുജനങ്ങള്‍ക്കായി തുറന്നു കൊടുക്കാന്‍ തീരുമാനിച്ചിരിക്കുന്നത്.

ആദിമ അമേരിക്കന്‍ ഗോത്രവര്‍ഗങ്ങളുടെ ശേഷിപ്പുകള്‍ ഉറങ്ങുന്ന ഈ ദ്വീപിന്റെ നൂറ്റാണ്ടുകള്‍ മുമ്പുള്ള പ്രതാപം തിരിച്ചു പിടിക്കാനാണ് പുതിയ ഉടമസ്ഥരുടെ ശ്രമം. 1711ന് മുമ്പ് ഇവിടെ ജീവിച്ചിരുന്ന ആദിമ അമേരിക്കന്‍ വംശജരുടെ ചരിത്രവും അവരുടെ സംസ്‌കാരവും ദ്വീപിലെത്തുന്നവര്‍ക്ക് മുന്നില്‍ ഇനി തുറന്നു കാട്ടപ്പെടുമെന്ന് സിപ്‌സണ്‍ ഐലന്‍ഡ് ട്രസ്റ്റ് പ്രതിനിധികള്‍ പറയുന്നു. 24ഏക്കറില്‍ വ്യാപിച്ചു കിടക്കുന്ന ദ്വീപ് കഴിഞ്ഞ ദിവസമാണ് പൊതുജനങ്ങള്‍ക്കായി തുറന്നു കൊടുത്തത്. പ്ലസെന്റ് ബേ എന്നാണ് ദ്വീപ് സ്ഥിതി ചെയ്യുന്ന ഭാഗം അറിയപ്പെടുന്നത്. ഇവിടെയെത്തുന്ന സഞ്ചാരികള്‍ക്ക് ഹൈക്കിംഗ് ഉള്‍പ്പെടെയുള്ള വിനോദങ്ങള്‍ക്ക് അവസരമുണ്ട്. മണല്‍പ്പരപ്പുകളും ഉള്‍ക്കടലിന്റെ ഭംഗിയും ആവോളം ആസ്വദിക്കാം.

ലഖ്‌നൗ: ലോകമഹാത്ഭുതങ്ങളില്‍ ഒന്നായ താജ്മഹല്‍ നീണ്ട ആറ് മാസത്തിന് ശേഷം സന്ദര്‍ശകര്‍ക്കായി തുറന്നു കൊടുക്കുന്നു. അണ്‍ലോക്ക് 4ന്റെ ഭാഗമായി സെപ്തംബര്‍ 21 മുതല്‍ താജ്മഹലും ആഗ്ര കോട്ടയും തുറന്ന് കൊടുക്കുമെന്ന് സ്മാരക ചുമതലയുളള പുരാവസ്തു ശാസ്ത്രജ്ഞന്‍ ബസന്ത് കുമാര്‍ അറിയിച്ചു.

താജ്മഹലില്‍ ദിവസം 5000 പേരെയും ആഗ്ര കോട്ടയില്‍ 2500 പേരെയും മാത്രമേ പ്രതിദിനം സന്ദര്‍ശിക്കാന്‍ അനുവദിക്കൂ. ടിക്കറ്റ് കൗണ്ടറുകളുണ്ടാകില്ല. ഇലക്ട്രിക് ടിക്കറ്റുകളാകും സന്ദര്‍ശകര്‍ക്ക് നല്‍കുക. മാര്‍ച്ച് മാസത്തില്‍ കേന്ദ്ര സര്‍ക്കാര്‍ ഏര്‍പ്പെടുത്തിയ കൊവിഡിനെതിരായ ഒന്നാംഘട്ട ലോക്ഡൗണ്‍ സമയത്താണ് താജ്മഹല്‍ അടച്ചത്. നിലവില്‍ ഉത്തര്‍പ്രദേശില്‍ 3920 കൊവിഡ് മരണമുണ്ടായി. 61,625 ആക്ടീവ് കേസുകളാണ് സംസ്ഥാനത്തുളളത്.

ഉയരത്തില്‍ കണ്ണാടിപോലെയുള്ള പാലത്തിലൂടെ നടക്കുന്നത് ഓര്‍ത്താല്‍ ഭയം തോന്നാറുണ്ടോ?…പൊട്ടി പോയാല്‍ ആകാശം മുട്ടുന്ന ഉയരത്തില്‍ നിന്നും താഴെ വീഴുമെന്ന കാര്യം ഉറപ്പാണ്. ഉയരത്തിലുള്ള ചില്ലുപാലത്തിലൂടെ നടക്കുമ്പോള്‍ ഏതു ധൈര്യശാലിയുടെയും കാലിടറും. ഇങ്ങനെ ഇത്ര പേടിച്ചു ആരെങ്കിലും കണ്ണാടിയിലൂടെ നടക്കുമോ! മനകട്ടിയുള്ളവര്‍ക്കുമാത്രമേ ഇങ്ങനെയൊരു സാഹസികയാത്രയ്ക്ക് തയാറെടുക്കാന്‍ സാധിക്കുള്ളൂ.

സഞ്ചാരികളെ കാത്ത് നിരവധി അദ്ഭുത കാഴ്ചകളാണ് ചൈനയില്‍ ഒരുക്കിയിരിക്കുന്നത്. വിസ്മയകാഴ്ചകളില്‍ ഒന്നാണ് ചൈനയിലെ കണ്ണാടിപാലം. നിലവില്‍ 2,300 ഗ്ലാസ് പാലങ്ങളാണ് ചൈനയിലുള്ളത്. ഇപ്പോഴിതാ കണ്ണാടിയില്‍ നിര്‍മിച്ച ലോകത്തിലെ ഏറ്റവും വലിയ പാലം ചൈനയില്‍ തുറന്നിരിക്കുകയാണ്. തെക്കന്‍ ചൈനയിലെ ഹുവാങ്ചുവാന്‍ ത്രീ ഗോര്‍ജസ് പ്രദേശത്തെ ലിയാന്‍ജിയാങ് നദിക്ക് കുറുകെയാണ് പാലം നിര്‍മിച്ചിരിക്കുന്നത്. സെജിയാങ് സര്‍വകലാശാലയിലെ ആര്‍ക്കിടെക്ചറല്‍ ഡിസൈന്‍ ആന്‍ഡ് റിസര്‍ച്ച് ഇന്‍സ്റ്റിറ്റ്യൂട്ടാണ് ലോകത്തിലെ ഏറ്റവും നീളമേറിയ ഗ്ലാസ് പാലം നിര്‍മിച്ചിരിക്കുന്നത്.

526 മീറ്റര്‍ നീളവും ചില്ലുപോലെയുള്ള അടിവശം ഉള്ള ഈ പാലം സഞ്ചാരികളെ വിസ്മയിപ്പിക്കും. സന്ദര്‍ശകര്‍ക്ക് നടന്ന് കാഴ്ചകള്‍ ആസ്വദിക്കുവാനും ചിത്രങ്ങള്‍ പകര്‍ത്തുവാനും പാലത്തിനോട് ചേര്‍ന്ന് പ്രത്യേക പ്ലാറ്റുഫോമും ഒരുക്കിയിട്ടുണ്ട്.1.7 ഇഞ്ച് കട്ടിയുള്ള ടെമ്പര്‍ഡ് ഗ്ലാസിന്റെ മൂന്നു പാളികള്‍ ചേര്‍ത്താണ് പാലത്തിന്റെ നടപ്പാത നിര്‍മിച്ചിരിക്കുന്നത്. കൂടാതെ സ്റ്റെയിന്‍ലെസ് സ്റ്റീല്‍ കൊണ്ട് നിര്‍മ്മിച്ച ഗാര്‍ഡ് റെയിലുകളുമുണ്ട്. ഗ്ലേസിംഗ് ബ്രിഡ്ജ് ഡെക്കിനെ ക്രിസ്റ്റല്‍ പോലുള്ള തിളക്കം, ഉയര്‍ന്ന സുതാര്യതകൊണ്ടും താഴെയുള്ള കാഴ്ചകളും വ്യക്തമായി കാണാം. കൂടാതെ ബോട്ടുകള്‍ നിറഞ്ഞ നദിക്കരയില്‍ നിന്ന് 201 മീറ്റര്‍ ഉയരത്തില്‍ സ്ഥിതിചെയ്യുന്ന തരത്തിലാണ് ഇത് രൂപകല്‍പന ചെയ്തിരിക്കുന്നത്.

യാത്രകൾ പുതിയ സംസകാരങ്ങളിലേക്കുള്ള ഒറ്റയടിപ്പാതകളാണെന്ന കാര്യത്തിൽ ആർക്കും സംശയം ഉണ്ടാവില്ല.ഓരോ യാത്രകളും നമ്മളിൽ അവശേഷിപ്പിക്കുന്ന ഊർജവും ഓർമ്മകളും ഒരു സ്മാരകശിലയായി ഉള്ളിന്റെ ഉള്ളിലെ ഒടുങ്ങാത്ത ആവേശമായി യാത്രക്കാരനിൽ നിലകൊള്ളും.കാലം മാറിയപ്പോൾ യാത്രകളെ കുറിച്ചുള്ള സങ്കൽപ്പങ്ങളും മാറി.എന്തിലും പുതിയത് കണ്ടത്തുക എന്ന മനുഷ്യന്റെ ആവേശം ലോകത്തിന് സമ്മാനിച്ച കണ്ടുപിടുത്തണങ്ങളിൽ യാത്രകളും ഇടംപിടിച്ചുകഴിഞ്ഞു.എങ്ങിനെ വ്യത്യസ്തമാക്കാം എന്നതാണ് എല്ലാത്തിലും നമ്മെ ഭരിക്കുന്ന വികാരം.ഇക്കാര്യത്തിൽ യുവാക്കളെന്നോ മുതിർന്നവരെന്നോ ഉള്ള വ്യത്യാസമില്ല.എല്ലാകാലത്തും യാത്രകളിലും പരീക്ഷണങ്ങൾ ഉണ്ടായിട്ടുണ്ട്.അത്തരത്തിൽ ഒരു പരീക്ഷണം അല്ലെങ്കിൽ വ്യത്യസ്തമായ ഒരു യാത്ര,അതാണ് ഡൽഹിയിൽനിന്ന് ലണ്ടനിലേക്ക് ഒരു ബസ് യാത്ര എന്നത്.
അഡ്വഞ്ചേഴ്‌സ് ഓവർലാൻഡ് എന്ന കമ്പനിയാണ് ഡൽഹി ലണ്ടൻ ബസ് യാത്ര ഒരുക്കിയിരിക്കുന്നത്.70 ദിവസങ്ങൾകൊണ്ട് 18 രാജ്യങ്ങൾ കടന്ന് ആ സ്വപ്ന യാത്ര ലണ്ടനിൽ അവസാനിക്കും.
ഹരിയാന ഗുരുഗ്രാമിലെ അഡ്വഞ്ചേഴ്‌സ് ഓവർലാൻഡ്കമ്പനിയാണ് വ്യത്യസ്തതമായ ഒരു വിസ്മയ യാത്ര ഒരുക്കുന്നത്.20000 കിലോമീറ്റർ പിന്നിടുന്ന 70 ദിവസത്തെ യാത്ര 18 രാജ്യങ്ങളെ കടന്നുപോകും.ബസ് ടു ലണ്ടൻ എന്നാണ് യാത്രയുടെ പേര്.ചൈന,പോളണ്ട്,ഫ്രാൻസ്, മ്യാൻമർ,ലാവോസ്,തായ്‌ലൻഡ്,കിർഗിസ്ഥാൻ,ഉസ്‌ബെക്കിസ്ഥാൻ,കസാക്കിസ്ഥാൻ,റഷ്യ,ലാറ്റ്വിയ,ലത്വാനിയ,പോളണ്ട്,ചെക്ക് റിപ്പബ്ലിക്,ജർമ്മനി,നെതെർലാൻഡ്‌,ബെൽജിയം,ഫ്രാൻസ്,ഇംഗ്ലണ്ട് എന്നതായിരിക്കും ബസിന്റെ റൂട്ട്.70 ദിവസം നീണ്ടുനിൽക്കുന്ന യാത്രയ്ക്ക് 15 ലക്ഷം രൂപയാണ് ചിലവ്.2021 മെയ് മാസത്തേക്കാണ് യാത്ര ഷെഡ്യൂൾ ചെയ്തിരിക്കുന്നത്.വലിയ തുക മുടക്കുവാൻ താല്പര്യമില്ലാത്തവർക്കും സമയമില്ലാത്തവർക്കുമായി യാത്രയുടെ വിവിധ ഘട്ടങ്ങളെ തരംതിരിച്ചുള്ള വിവിധ പാദങ്ങളിൽ പങ്കെടുക്കാം.മ്യാൻമർ തായ്‌ലൻഡ് ഉൾക്കൊള്ളിച്ചുകൊണ്ടുള്ള ആദ്യ ഷെഡ്യൂളിൽ 12 ദിവസ യാത്രയ്ക്ക് 350000 രൂപ ഈടാക്കും. തായ്‌ലൻഡ് ,ലാവോസ് വഴി ചൈനയിൽ എത്തുന്ന യാത്ര 16 ദിവസം നീണ്ടുനിൽക്കും.425000 രൂപയാണ് ചാർജ്.മൂന്നാം ഷെഡ്യൂൾ ചൈനയിൽനിന്ന് തുടങ്ങി കസാക്കിസ്ഥാൻ,റഷ്യ എന്നിവിടങ്ങൾ സന്ദർശിയ്ക്കും .22 ദിവസങ്ങൾ നീണ്ടുനിൽക്കുമ്പോൾ 495000 രൂപയാണ് ചാർജ്.അവസാന ഷെഡ്യൂൾ റഷ്യയിൽനിന്ന് 16 ദിവസമെടുത്തു 10 രാജ്യങ്ങൾ കടന്ന് യുറോപ്പിലെത്തും.425000 രൂപ ഈടാക്കും.നിരവധി രാജ്യങ്ങളും സംസ്കാരങ്ങളും കടന്ന് ആസ്വാദിച്ചുകൊണ്ടുള്ള യാത്രയെ ഒരു സ്വാപ്നയാത്രയായി ഓപ്പറേറ്റർമാർ വിശേഷിപ്പിക്കുന്നു.ഡൽഹി മുതൽ ലണ്ടൻ വരെ നേരിട്ടുള്ള യാത്രികർക്ക് തന്നെയാണ് മുൻഗണന.ലോകത്തിലെ ഏറ്റവും വലിയ ബസ് യാത്ര ആയിരിക്കും ഇത്.ഇരുപത് പേർക്കുള്ള ബിസിനസ് ക്‌ളാസ് സീറ്റുകളാണ് ബസുകളിൽ ഉണ്ടാവുക. ഡ്രൈവർ,അസിസ്റ്റന്റ് ഡ്രൈവർ,സഹായി,ഗൈഡ് തുടങ്ങിയവർകൂടി ബസിൽ ഉണ്ടാകും.ഭക്ഷണവും താമസവും പഞ്ചനക്ഷത്ര സൗകാര്യങ്ങ ളോട്കൂടി ആയിരിക്കുമെന്ന് കമ്പനി അവകാശപ്പെടുന്നു.ഇന്ത്യൻ ഭക്ഷണംകൂടി ലഭ്യമാക്കും.തിരിച്ചുവരവിനും ഇതേ റൂട്ടിൽ ബസ് ഉണ്ടാകും എന്നാൽ ഇതേ തുക തന്നെ മുടക്കേണ്ടിവരും.നേരത്തെ മെയ് മാസത്തേക്കാണ് യാത്ര പ്ലാൻ ചെയ്തതെങ്കിലും കോവിഡ് 19 പൂർണ്ണമായി ഇല്ലാതാകുന്ന ഘട്ടത്തിൽ മാത്രമായിരിക്കും ഇനി യാത്ര ഉണ്ടാവുക എന്നാണ് അറിയുന്നത്.ഇതിന്റെ ബുക്കിംഗ് ആരംഭിച്ചു കഴിഞ്ഞതായി കമ്പനി അധികൃതർ അവകാശപ്പെടുന്നു.

photo courtesy: travelindiasure.com

സികെ ശ്രീജിത്ത്

കണ്ണൂർ : കോവിഡ് 19 വിതച്ച നാശം ചെറുതല്ല.സർവ്വ മേഖലയിലും പ്രതിസന്ധികൾ മാത്രം സൃഷ്‌ടിച്ച കൊറോണ വൈറസ് വ്യാപനം ഏതാണ്ട് പൂർണമായും തകർത്തെറിഞ്ഞത് വിനോദ സഞ്ചാര മേഖലയെ.ഇനിയൊരു തിരിച്ചുവരവ് സാധ്യമല്ലെന്ന തിരിച്ചറിവിൽ ഈ മേഖലയിൽ ജോലി ചെയ്തിരുന്ന പലരും മറ്റ് മാര്ഗങ്ങൾ തേടി തുടങ്ങി.സംസ്ഥാനത്തെ ടൂറിസ്റ് ബസ് ജീവനക്കാർ പലരും മറ്റ്‌ പല ജോലികളിലേക്കും ചേക്കേറാൻ തുടങ്ങി.കോവിഡ് പ്രതിസന്ധി മാറിയാലും ടൂറിസം മേഖലയിൽ അടുത്ത കാലത്തൊന്നും ആളുകൾ എത്താൻസാധ്യതയില്ലാത്തതിനാൽ പുതിയ ഉപജീവന മാർഗം കണ്ടെത്തിയേ മതിയാകു എന്ന നിലപാടിലാണ് ഈ രംഗത് പ്രവർത്തിക്കുന്നവരുടെ നിലപാട്.ടൂറിസ്റ് ബസ്സുകൾ മിക്കതും കടപ്പുറത്തേക്ക് നീങ്ങുന്ന സ്ഥിതിയാണ്.ഒരുവേള സുവർണ്ണകാലമായിരുന്ന ഈ രംഗത്തെ പലരും എന്ത് ചെയ്യണമെന്നറിയാത്ത സ്ഥിതിയിലാണ്.ബസ് ഉടമകൾ ചെറിയ വിലക്ക് ബസ്സുകൾ വിറ്റഴിക്കാൻ ശ്രമം നടത്തി എങ്കിലും അതിനുപോലും ആളില്ല.ടൂറിസം മേഖല തഴച്ചു വളർന്നിരുന്ന സമയത് മത്സര മനോഭാവത്തോടെ ലോണെടുത്തും മറ്റും വാങ്ങിക്കൂട്ടിയ വോൾവോ,മാർക്കോപോളോ സ്‌കാനിയ കമ്പനികളുടെ ബസ്സുകൾ കൃത്യമായ സർവീസുകൾപോലും കിട്ടാതെ ഓട്ടം നിലച്ച മട്ടാണ്.വമ്പൻ ബ്രാൻഡുകളായി ആധിപത്യം സ്ഥാപിച്ച അന്തർ സംസ്ഥാന
ബസ് ഉടമസ്ഥ സംഘം എന്ത് ചെയ്യണം എന്നറിയാത്ത സ്ഥിതിയിലാണ്.സംസ്ഥാനത്തിനകത്തും പുറത്തുമുള്ള വിനോദ സഞ്ചാര കേന്ദ്രങ്ങൾ കാടു മൂടുന്ന സ്ഥിതിയിലാണ്.
കർണാടകത്തിലെ കൂർഗ്,മൈസൂർ,ബംഗളുരു എന്നിവിടങ്ങളിലെ വിനോദസഞ്ചാര കേന്ദ്രങ്ങളിലെ ചെറുകിട കച്ചവടക്കാർ മുഴുവൻ ഒഴിഞ്ഞുപോയി.റിസോർട്ടുകൾ പലതും ബ്രാൻഡ് നിലനിർത്താനെന്നോണം പേരിന് പ്രവർത്തിക്കുന്നു.പലരും ജീവനക്കാരെ പകുതിയിലധികം പേരെയും താൽക്കാലികമായി പറഞ്ഞുവിട്ടു.പ്രതിസന്ധി തീർന്നാൽ വന്നാൽ മതി എന്നാണ് അറിയിപ്പ്.കൂർഗിലെ മലയാളികളുടെ ഹോട്ടലുകൾ വൻ പ്രതിസന്ധിയിലാണ്.പിടിച്ചു നില്ക്കാൻ പറ്റില്ല എന്ന അവസ്ഥയാണെന്ന് ഉടമകൾ ജെ ജി ഐ ന്യൂസിനോട് പറഞ്ഞു.മലയാളികൾ ഏറെ എത്തിയിരുന്ന കൂർഗിലെയും മൈസൂരിലെയും ഹോം സ്റ്റേകൾ മിക്കതും പൂട്ടി.ടൂറിസ്റ് ടാക്സി മേഖലയിൽ പ്രവർത്തിച്ചിരുന്ന ഡ്രൈവർമാർ മിക്കവാറും മറ്റ് മേഖലകളിലേക്ക് തൊഴിൽതേടി ഇറങ്ങി.സംസ്ഥാനത്തെ വിവിധ നഗരങ്ങളിൽ നല്ല രീതിയിൽ പ്രവർത്തിച്ചിരുന്ന ട്രാവൽ ഏജൻസി ഓഫീസുകൾ പേരിനുമാത്രമായാണ് തുറക്കുന്നതെന്ന് ഈ മേഖലയിൽ ഉള്ളവർ പറയുന്നു.എന്നാൽ പ്രതിസന്ധികൾ കാർ,ഇരുചക്ര വാഹന ഡീലർമാർ,യൂസ്‌ഡ്‌ കാർ വിൽപ്പനക്കാർ എന്നിവർക്ക് ഗുണകരമായി മാറി.പൊതു ഗതാഗതം സുരക്ഷിതമല്ലെന്ന വിശ്വാസം മിക്കവരെയും സ്വന്തം വാഹനങ്ങൾ വാങ്ങുന്നതിന് പ്രേരിപ്പിക്കുന്നു.വിനോദ സഞ്ചാര മേഖലയിലെന്നപോലെ പിൽഗ്രിമേജ്ടൂറിസവും മൺസൂൺ ടൂറിസവുമൊക്കെ ഇല്ലാതായി.സംസ്ഥാനത്തെ ആരാധനാലയങ്ങൾ കേന്ദ്രീകരിച്ചുള്ള കച്ചവട സ്ഥാപനങ്ങളും ഹോട്ടലുകളും മിക്കതും പൂട്ടി .വൻകിട ഹോട്ടലുകാരും പ്രതിസന്ധികാരണം ജീവനക്കാരെ വെട്ടിക്കുറച് പേരിന് പ്രവർത്തിക്കുന്നു.ഹോട്ടലുകളിലെ റസ്റ്റോറന്റുകൾ പലതും പൂട്ടിക്കഴിഞ്ഞു.കോവിഡ് പ്രതിസന്ധികൾ തീർന്ന് വിനോദ സഞ്ചാര മേഖല പഴയ പ്രതാപത്തിലെത്തുമെന്ന പ്രതീക്ഷയിലാണ് ഒരുകൂട്ടം ആളുകൾ.

PHOTO COURTESY: NEWS 18 COM