breaking news

കോഴിക്കോട്ട് ഗുരുതര രോഗ വ്യാപന സാധ്യതയെന്ന് മുന്നറിയിപ്പ്, ജാഗ്രതാ നിർദേശം

കോഴിക്കോട്: കോവിഡ് വ്യാപനം രൂക്ഷമായ സംസ്ഥാനത്ത് ജില്ലകൾ തിരിച്ചുള്ള വ്യാപന തോത് ആരോഗ്യ വകുപ്പ് വിലയിരുത്താൻ തുടങ്ങി.

എറണാകുളത്തും കോഴിക്കോട്ടും ജാഗ്രത പാലിക്കാൻ ആരോഗ്യ വകുപ്പ് മന്ത്രിയുടെ നേതൃത്വത്തിൽ ചേർന്ന അടിയന്തിര യോഗം തീരുമാനിച്ചിരുന്നു.

കോഴിക്കോട്ട് ഗുരുതര രോഗ വ്യാപനം ഉണ്ടായേക്കാം എന്ന മുന്നറിയിപ്പിന്റെ പശ്ചാത്തലത്തിൽ ആരോഗ്യ വകുപ്പ് മുന്നൊരുക്കങ്ങൾ തുടങ്ങി.കോഴിക്കോട് ബീച്ച് ആശുപത്രിയെ വീണ്ടും കോവിഡ് ആശുപത്രി ആക്കിയേക്കും.

താലൂക്ക്-ജില്ലാ ആശുപത്രികളിലെ കിടക്കകളിൽ 15 മുതൽ 25 ശതമാനം വരെ ഒഴിച്ചിടാൻ നിർദേശം നൽകിയിട്ടുണ്ട്.കോഴിക്കോട് മെഡിക്കൽ കോളേജിലും നിയന്ത്രണങ്ങൾ ഏർപ്പെടുത്തും.ആശുപത്രി സന്ദർശനത്തിന് പ്രോട്ടോകോൾ ഏർപ്പെടുത്തും.രോഗികളുടെ കൂട്ടിരിപ്പിന് ഒരാളെ മാത്രമേ അനുവദിക്കൂ.സന്ദർശകർക്ക് നിയന്ത്രണം ഏർപ്പെടുത്തും.

സംസ്ഥാനത്ത് കോവിഡ് വ്യാപനം രൂക്ഷമായ പശ്ചാത്തലത്തിൽ ആരോഗ്യമന്ത്രിയുടെ നേതൃത്വത്തിൽ അടിയന്തിര യോഗം ചേർന്ന് സ്ഥിതിഗതികൾ വിലയിരുത്തിയിരുന്നു.

എറണാകുളത്ത് കനത്ത ജാഗ്രത പാലിക്കാൻ തീരുമാനിച്ചു. എറണാകുളത്ത് കോവിഡ് ചികിത്സയ്ക്ക് പ്രത്യേക സംവിധാനം തന്നെ ഒരുക്കാൻ തീരുമാനമായി. ഇതിന്റെ ഭാഗമായി ഫോർട്ട് കൊച്ചി താലൂക്ക് ആശുപത്രി കോവിഡ് ആശുപത്രിയാക്കി മറ്റും.കളമശ്ശേരി മെഡിക്കൽ കോളേജിനെയും കോവിഡ് ആശുപത്രിയാക്കി മാറ്റും.

സർക്കാർ മേഖലയിൽ ആയിരം ഓക്സിജൻ കിടക്കകൾ ഒരുക്കും.വാളയാറിലും വിവിധ ജില്ലാ അതിർത്തികളിലും നാളെ മുതൽ പരിശോധന കർശനമാക്കും.ആരോഗ്യ ജാഗ്രത പോർട്ടലിൽ രജിസ്റ്റർ ചെയ്തവർക്ക് മാത്രമായിരിക്കും സംസ്ഥാനത്തേക്ക് പ്രവേശനം അനുവദിക്കൂ.ഇനിയുള്ള രണ്ടാഴ്ച്ചക്കാലം കനത്ത ജാഗ്രത പാലിക്കണമെന്നും വളരെ അത്യാവശ്യത്തിന് മാത്രമേ പുറത്തിറങ്ങാൻ പാടുള്ളു എന്നും മാനദണ്ഡങ്ങൾ പാലിക്കണമെന്നും ആരോഗ്യവകുപ്പ് മുന്നറിയിപ്പുണ്ട്.