breaking news

കണ്ണൂരില്‍ ഇനി രണ്ട് പോലീസ്…സിറ്റിയും റൂറലുമായി തരം തിരിച്ചു

കണ്ണൂര്‍: ക്രമസമാധാന പാലനം കൂടുതല്‍ കാര്യക്ഷമമാക്കുന്നതിന് കണ്ണൂര്‍ പൊലീസിനെ രണ്ടായി വിഭജിച്ചു. കണ്ണൂര്‍ സിറ്റി, കണ്ണൂര്‍ റൂറല്‍ എന്നിങ്ങനെയാണ് വിഭജനം. രണ്ട് എസ്.പിമാര്‍ക്കായി ഇതിന്റെ ചുമതല നല്‍കും.കണ്ണൂര്‍, തലശേരി സബ് ഡിവിഷനും മട്ടന്നൂര്‍ വിമാനത്താവളവും ചേര്‍ന്നുള്ളതാണ് സിറ്റി ഡിവിഷന്‍. തളിപ്പറമ്പ്, ഇരിട്ടി ഡിവിഷനുകളാണ് കണ്ണൂര്‍ റൂറല്‍ ആയി വിഭജിച്ചിട്ടുള്ളത്. മാങ്ങാട്ട്പറമ്പിലായിരിക്കും കണ്ണൂര്‍ റൂറലിന്റെ ആസ്ഥാനം.

വര്‍ദ്ധിച്ചു വരുന്ന അക്രമങ്ങളും ക്രമസമാധാന പ്രശ്നങ്ങളും കാര്യക്ഷമമായി നടപ്പാക്കുന്നതിന് ഇപ്പോഴത്തെ സംവിധാനം മതിയാകുന്നില്ലെന്ന കണ്ടെത്തലാണ് പുതിയ ഡിവിഷനുകള്‍ രൂപീകരിച്ചതിനു പിന്നില്‍. ഇതു സംബന്ധിച്ച് നേരത്തെ പറഞ്ഞിരുന്നെങ്കിലും തീരുമാനം വൈകുകയായിരുന്നു.

വിഭജനത്തിന്റെ ഭാഗമായി പൊലീസില്‍ അംഗബലവും വര്‍ദ്ധിപ്പിക്കുന്നുണ്ട്. സ്‌പെഷ്യല്‍ ബ്രാഞ്ചിലും മറ്റും കൂടുതല്‍ പേര്‍ക്ക് നിയമനം നല്‍കും. സിവില്‍ പൊലീസ് ഓഫീസര്‍മാരായി സിറ്റിയിലും റൂറലിലും അമ്പതോളം പേരെ കൂടുതല്‍ നിയമിച്ചേക്കും.