breaking news

തലസ്ഥാന നഗരിയിൽ പോലീസുകാർക്കിടയിൽ കോവിഡ് പടരുന്നു

തിരുവനന്തപുരം: തലസ്ഥാന നഗരിയിൽ ആശങ്ക പടർത്തി പോലീസുകാർക്കിടയിൽ കോവിഡ് പടരുന്നു.രണ്ട് എസ് ഐ മാരുൾപ്പെടെ 25 പോലീസുകാർക്ക് കോവിഡ് സ്ഥിരീകരിച്ചു.

ലോക്ക് ഡൗൺ നടപ്പാക്കുന്നതിനായി മുൻപന്തിയിൽ നിൽക്കുന്നത് പോലീസ് സേനയാണ്.കോവിഡ് ഒന്നാം തരംഗത്തിന്റെ ആദ്യ ഘട്ടത്തിൽ പോലീസുകാർക്കിടയിൽ കോവിഡ് ബാധയുണ്ടായിരുന്നെങ്കിലും രണ്ടാം തരംഗത്തിൽ കാര്യമായി ഉണ്ടായിരുന്നില്ല.എന്നാൽ ഈ ആഴ്ച്ച മുതലുള്ള കണക്കുകളിൽ തിരുവനന്തപുരത്ത് പോലീസുകാർക്കിടയിൽ കോവിഡ് വ്യാപനം കൂടുന്നതായാണ് റിപോർട്ടുകൾ.

തിരുവനന്തപുരം പേരൂർക്കട പോലീസ് സ്റ്റേഷനിൽമാത്രം 12 പോലീസുകാർക്ക് കോവിഡ് സ്ഥിരീകരിച്ചിട്ടുണ്ട്.സിറ്റി സ്പെഷ്യൽ ബ്രാഞ്ചിലെ 7 പോലീസുകാർക്കും കന്റോൺമെന്റ് സ്റ്റേഷനിലെ 6 പോലീസുകാർക്കും കോവിഡ് ബാധിച്ചിട്ടുണ്ട്.

സമ്പർക്കത്തിൽ ഏർപ്പെട്ടവർ നിരീക്ഷണത്തിൽ പോകണമെന്ന് പൊതുവെ സ്വീകരിക്കുന്ന പതിവ്, ജോലിഭാരം കണക്കിലെടുത്ത് പോലീസുകാരിൽ നടപ്പാക്കുന്നില്ലെന്നും പരാതിയുണ്ട്.