breaking news

സർക്കാർ ജീവനക്കാർക്കും അധ്യാപകർക്കുമുള്ള വാക്‌സിനേഷൻ:വിവര ശേഖരണം തുടങ്ങി

മട്ടന്നൂർ: സംസ്ഥാന സർക്കാർ ജീവനക്കാർക്കും അധ്യാപകർക്കുമുള്ള കോവിഡ് പ്രതിരോധ കുത്തിവെപ്പ് ഉടൻ തുടങ്ങും. ഇതുസംബന്ധിച്ചുള്ള വിവര ശേഖരണം തുടങ്ങി.

കോവിഡ് മുന്നണി പോരാളികൾക്കുള്ള കുത്തിവെപ്പ് പൂർത്തിയായിക്കൊണ്ടിരിക്കുന്ന പശ്ചാത്തലത്തിലാണ് അടുത്ത ഘട്ടത്തിനായുള്ള വിവര ശേഖരണം ആരോഗ്യവകുപ്പ് തുടങ്ങിയത്.ആരോഗ്യവകുപ്പിനും പോലീസിനും പുറമെ റവന്യൂ,തദ്ദേശ സ്ഥാപനങ്ങൾ തുടങ്ങിയ ഓഫീസുകളിലെ ജീവനക്കാർക്കും വാക്‌സിനേഷൻ തുടങ്ങിയിട്ടുണ്ട്. വില്ലേജ്ഓഫീസുകൾ വഴിയാണ് ജീവനക്കാരുടെയും അധ്യാപകരുടെയും വിവര ശേഖരണം നടത്തുന്നത്.

ജീവനക്കാരുടെ പേര് വിവരങ്ങൾ,ആധാർ നമ്പർ,ജനന തീയ്യതി,മൊബൈൽ നമ്പർ തുടങ്ങിയ വിവരങ്ങളാണ് വില്ലേജ് ഓഫീസുകൾ വഴി ശേഖരിക്കുന്നത്.ഇങ്ങനെ ശേഖരിക്കുന്ന വിവരങ്ങൾ ക്രോഡീകരിച്ച് ആരോഗ്യ വകുപ്പിന് കൈമാറുകയാണ് ചെയ്യുക.

ആരോഗ്യവകുപ്പിന് ലഭ്യമാകുന്ന വിവരങ്ങൾ അനുസരിച്ചായിരിക്കും കുത്തിവെപ്പിനായുള്ള നിർദേശങ്ങൾ വ്യക്തിപരമായി മൊബൈൽ മെസ്സേജുകളായി എത്തുക.കുത്തി വെപ്പ് കേന്ദ്രം, മറ്റ് നിർദേശങ്ങൾ,രണ്ടാം ഘട്ട കുത്തിവെപ്പ് തുടങ്ങിയ വിവരങ്ങളും മൊബൈൽ ഫോണിൽ ലഭ്യമാകും.