breaking news

എം വി ജയരാജൻ തീവ്ര പരിചരണ വിഭാഗത്തിൽ : ആരോഗ്യനിലയിൽ മാറ്റമില്ല മെഡിക്കൽ ബുള്ളറ്റിൻ പുറത്തിറക്കി

പരിയാരം(കണ്ണൂർ ) :
സിപിഎം കണ്ണൂർ ജില്ലാ സെക്രട്ടറി എം വി ജയരാജന്റെ ആരോഗ്യ നില മാറ്റമില്ലാതെ തുടരുന്നു. കോവിഡിനൊപ്പം ന്യൂമോണിയ കൂടി ബാധിച്ച അദ്ദേഹം കണ്ണൂർ പരിയാരം മെഡിക്കൽ കോളേജിൽ തീവ്ര പരിചരണ വിഭാഗത്തിൽ ചികിത്സയിലാണ്.
ജയരാജന്റെ ആരോഗ്യ നില സംബന്ധിച്ച് മെഡിക്കൽ കോളേജ് അധികൃതർ പുറത്തിറക്കിയ മെഡിക്കൽ ബുള്ളറ്റിനിൽ അദ്ദേഹത്തിന് രക്ത സമ്മർദവും പ്രമേഹവും ഉണ്ടെന്നും ഐ സി യു വിൽ ചികിത്സയിലാണെന്നും പറയുന്നു.
രക്തത്തിൽ ഓക്സിജന്റെ അളവ് ക്രമാതീതമായി കുറയുന്ന അവസ്ഥയുള്ളതിനാൽ സി-പാപ് വെന്റിലേറ്റർ സഹായത്തോടെ സാധാരണ നിലയിലേക്ക് ക്രമീകരിച്ചിട്ടുണ്ടെന്ന് ഡോക്ടർമാർ അറിയിച്ചു.
മന്ത്രി കെ കെ ശൈലജയുയുടെ നിർദേശപ്രകാരം കോഴിക്കോട് മെഡിക്കൽ കോളേജിലെ ക്രിറ്റിക്കൽ കെയർ വിദഗ്ധൻ ഡോ . അനൂപ്,ഡോ പിജി രാജു എന്നിവർ ഇന്ന് രാവിലെ അദ്ദേഹത്തെ പരിശോധിച്ചിട്ടുണ്ട്.ആരോഗ്യ നിലയിൽ നേരിയ പുരോഗതി ഉണ്ടെങ്കിലും ന്യൂമോണിയ കൂടി പരിഗണിച്ച് ഇപ്പോൾ നൽകി വരുന്ന ചികിത്സ തുടരാൻ മെഡിക്കൽ സംഘം തീരുമാനിച്ചു.
തിരുവനന്തപുരം മെഡിക്കൽ കോളേജിലെ ക്രിട്ടിക്കൽ കെയർ വിദഗ്ധരായ ഡോ.സന്തോഷ് കുമാർ എ എസ്,ഡോ.അനിൽ സത്യദാസ് എന്നിവർ അൽപ സമയത്തിനകം ജയരാജനെ പരിശോധിക്കും.
മന്ത്രി കെ കെ ശൈലജ നേരിട്ട് വിളിച്ചു ചേർത്ത മെഡിക്കൽ ബോർഡ് യോഗത്തിലും സ്ഥിതിഗതികൾ വിലയിരുത്തിയിട്ടുണ്ട്.
മെഡിക്കൽ കോളേജ് പ്രിൻസിപ്പാൾ ഡോ. കെ എം കുര്യാക്കോസ് ചെയർമാനും സൂപ്രണ്ട് ഡോ.സുദീപ് കൺവീനറുമായ മെഡിക്കൽ സംഘമാണ് ജയരാജനെ ചികില്സിക്കുന്നത്.വിവിധ വകുപ്പുകളിലെ ഡോക്ടർമാരുടെ ഏകോപനവും ഉണ്ടായിരിക്കും.

ജയരാജന്റെ ചികിത്സ സംബന്ധിച്ച് മുഖ്യമന്ത്രി പിണറായി വിജയൻ ആശപത്രി സൂപ്രണ്ട് ഡോ.സുദീപ് കുമാറിനെ നേരിട്ട് വിളിച്ച് സംസാരിച്ചിരുന്നു.