breaking news

കോവിഡ് വാക്‌സിൻ: തെറ്റിദ്ധാരണ പരത്തരുത്, രണ്ട് ഡോസ് വാക്‌സിൻ എടുക്കണം ആരോഗ്യമന്ത്രി

തിരുവനന്തപുരം: ആദ്യ ഡോസ് കോവിഡ് വാക്‌സിൻ എടുത്തവർ നിർബന്ധമായും രണ്ടാമത്തെ ഡോസ് എടുക്കണമെന്ന് ആരോഗ്യമന്ത്രി കെ കെ ശൈലജ പറഞ്ഞു.

കൃത്യമായ ഇടവേളകളിൽ രണ്ട് ഡോസ് വാക്‌സിൻ സ്വീകരിച്ചാൽ മാത്രമേ ഫലം ലഭിക്കുകയുള്ളു.നാല് മുതൽ ആറ് ആഴ്ചകൾക്കുള്ളിൽ രണ്ടാമത്തെ വാക്‌സിൻ സ്വീകരിക്കണം.ആദ്യ ഡോസിന് ശേഷം എന്തെങ്കിലും ശാരീരികമായ ബുദ്ധിമുട്ടുകൾ ഉണ്ടായെങ്കിൽ നിർബന്ധമായും റിപ്പോർട്ട് ചെയ്യണം.
പ്രശ്നങ്ങൾ മനസിലാക്കാൻ വേണ്ടിയാണ് രണ്ടാമത്തെ ഡോസ് എടുക്കാനുള്ള സമയം നീട്ടിയത്.വാക്‌സിൻ സംബന്ധിച്ച് തെറ്റിദ്ധാരണകൾ പരത്തരുതെന്നും മന്ത്രി പറഞ്ഞു.

ആരോഗ്യവകുപ്പ് സംഘടിപ്പിച്ച ‘വാക്‌സിൻ എടുക്കാം സുരക്ഷിതരാകാം’ ശില്പശാല ഉത്ഘാടനം ചെയ്‌തുകൊണ്ട് സംസാരിക്കുകയായിരുന്നു അവർ.
കേന്ദ്രസർക്കാർ മാനദണ്ഡങ്ങളോടെയാണ് വാക്‌സിനേഷൻ പ്രവർത്തനങ്ങൾ നടപ്പാക്കുന്നത്.വാക്‌സിനേഷനിലൂടെ മാത്രമേ രോഗത്തിനെതിരെയുള്ള കൃത്രിമ പ്രതിരോധം ആർജ്ജിക്കാൻ പറ്റു. അതുകൊണ്ട്തന്നെ ആളുകളിലേക്ക് വാക്‌സിൻ എത്തിക്കുകയാണ് ലക്‌ഷ്യം.

ആരോഗ്യ പ്രവർത്തകരാണ് ആദ്യം വാക്‌സിൻ സ്വീകരിക്കുന്നത് എന്നത്കൊണ്ട് തന്നെ കൃത്യമായ സന്ദേശമാണ് നൽകുന്നത്.വാക്‌സിൻ സ്വീകരിക്കുകയും ഒപ്പം നേരത്തെ ചെയ്തുപോന്ന മാനദണ്ഡങ്ങൾ പാലിക്കുകയും ചെയ്താൽ മാത്രമേ കോവിഡിനെ തുരത്താൻ പറ്റുകയുള്ളു എന്നും മന്ത്രി പറഞ്ഞു.

ജില്ലകളിൽ മന്ത്രിമാർക്കായിരിക്കും വാക്‌സിനേഷൻ ചുമതല.എല്ലാവരുടെയും സഹകരണം മന്ത്രി അഭ്യർത്ഥിച്ചു.