breaking news

കൊവിഡ് പ്രതിസന്ധി; സൗദിയില്‍ ജോലി നഷ്ടപെട്ട് 4ലക്ഷം പേര്‍

റിയാദ് : കോവിഡ് പ്രതിസന്ധിയെ തുടര്‍ന്ന് സൗദിയില്‍ ജോലി നഷ്ടപ്പെടുന്നവരുടെ എണ്ണമേറുന്നു. 2.84 ലക്ഷം വിദേശികള്‍ ഉള്‍പ്പെടെ 4 ലക്ഷം പേര്‍ക്കാണ് 3 മാസത്തിനിടെ ജോലി നഷ്ടപ്പെട്ടത്. ഇവരില്‍ 1.16 ലക്ഷം പേര്‍ സ്വദേശികളാണെന്ന് ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്‌സ് സൂചിപ്പിക്കുന്നു. ഈ വര്‍ഷം രണ്ടാം പാദത്തിലെ മാത്രം കണക്കാണിത്. ശമ്പളം വെട്ടിക്കുറച്ചത് ഉള്‍പ്പെടെ വിവിധ കാരണത്താല്‍ 60,000 വിദേശികളും 53,000 സ്വദേശികളും ജോലി രാജിവച്ചു.

കമ്പനികള്‍ തൊഴില്‍ കരാര്‍ പുതുക്കാതെ ജോലി നഷ്ടപ്പെട്ടവരും നിരവധി. പ്രധാനമായും നിര്‍മാണ മേഖലയിലെ തൊഴിലാളികള്‍ക്കാണ് കൂടുതലും ജോലി നഷ്ടമായത്. ചെറുകിട, ഇടത്തരം സംരംഭങ്ങളിലെ ജീവനക്കാര്‍ക്കും ജോലി പോയി. സ്വദേശിവല്‍ക്കരണം മൂലം ജോലി നഷ്ടപ്പെട്ടവര്‍ക്കു പുറമേയാണ് പുതിയ കണക്ക്. സ്വദേശികള്‍ക്കിടയിലെ തൊഴിലില്ലായ്മ നിരക്ക് 15.4% ആയി വര്‍ധിച്ചതും ഈ കാലയളവിലാണ്. ഒന്നാം പാദത്തില്‍ 11.8% ആയിരുന്നു തൊഴിലില്ലായ്മ നിരക്ക്. സൗദിയിലെ 1,36,30,454 ജോലിക്കാരില്‍ 23.3 % സ്വദേശികളും 76.7% വിദേശികളുമാണ്. സൗദിയില്‍ കോവിഡ് കുറഞ്ഞ്, സാധാരണ ജീവിതം പുനരാരംഭിച്ചതിനാല്‍ സമ്പദ്വ്യവസ്ഥ കൂടുതല്‍ മെച്ചപ്പെടുമെന്ന പ്രതീക്ഷയിലാണ് ജനം.