breaking news

വിദ്യാര്‍ത്ഥികളുടെ ഹര്‍ജി; അഞ്ചരക്കണ്ടി മെഡിക്കല്‍ കോളജ് മാനേജര്‍ക്കും പ്രിന്‍സിപ്പലിനുമെതിരെ അറസ്റ്റ് വാറന്റ്

മെഡിക്കല്‍ പി.ജി ക്ലാസുകള്‍ പുനരാരംഭിക്കണമെന്ന കോടതി നിര്‍ദേശം പാലിക്കാത്തതിനെ തുടര്‍ന്ന് അഞ്ചരക്കണ്ടി മെഡിക്കല്‍ കോളേജ് പ്രിന്‍സിപ്പലിനെയും മാനേജറെയും അറസ്റ്റ് ചെയ്ത് ഹാജരാക്കാന്‍ ഹൈക്കോടതി ഉത്തരവ്. വിദ്യാര്‍ത്ഥികള്‍ സമര്‍പ്പിച്ച ഹരജി പരിഗണിച്ചാണ് കോടതി ഉത്തരവ്. തിങ്കളാഴ്ച ഹാജരാക്കാനാണ് ജസ്റ്റിസ് പി.വി ആശയുടെ നിര്‍ദേശം.

ഇരുവരോടും വ്യാഴാഴ്ച കോടതിയില്‍ നേരിട്ട് ഹാജരാകാന്‍ നിര്‍ദേശിച്ചിരുന്നു. ഉത്തരവ് പാലിക്കാത്തതിനെ തുടര്‍ന്നാണ് അറസ്റ്റ് ചെയ്ത് ഹാജരാക്കാന്‍ ഉത്തരവിട്ടത്. ഡോ. ആര്‍.എസ്. ആന്‍സി,ഡോ.വി. അമിത് കുമാര്‍, ഡോ.ബിനു അഷറഫ് തുടങ്ങി 12 വിദ്യാര്‍ത്ഥികളാണ് പി.ജി ക്ലാസുകള്‍ തുടങ്ങണമെന്നാവശ്യപ്പെട്ട് കോടതിയില്‍ പരാതി സമര്‍പ്പിച്ചത്. പലതവണ നിര്‍ദേശിച്ചിട്ടും ക്ലാസ് തുടങ്ങാന്‍ മാനേജ്‌മെന്റ് താല്‍പര്യം കാട്ടുന്നില്ലെന്ന് കോടതി അഭിപ്രായപ്പെട്ടിരുന്നു. മാര്‍ച്ച് 23നാണ് മെഡിക്കല്‍ കോളേജിനെ ജില്ല കോവിഡ് കെയര്‍ സെന്ററാക്കി കലക്ടര്‍ ഏറ്റെടുത്തത്.

എന്നാല്‍ കോവിഡ് ചികിത്സയ്ക്ക് കോളേജിന്റെ ഒരു ഭാഗം മാത്രമേ ഏറ്റെടുത്തിട്ടുള്ളൂ എന്ന് സര്‍ക്കാര്‍ വ്യക്തമാക്കിയിരുന്നു.