breaking news

വർഷങ്ങൾ പ്രവർത്തകർ വീടിന് കാവലിരുന്നു,ചുറ്റും നിന്ന് സംരക്ഷിച്ചു, വികാരഭരിതനായും പൊട്ടിത്തെറിച്ചും കെ സുധാകരൻ

S P C I A L C O R R E S P O N D E N T

കൊച്ചി: കേരളാ രാഷ്ട്രീയത്തിൽ അലയടിക്കുന്ന വാക്പോരുകളുടെ തുടർച്ചയായി കെ പി സി സി അധ്യക്ഷൻ കെ സുധാകരൻ ഇന്ന് നടത്തിയ വാർത്താ സമ്മേളനം അക്ഷരാർത്ഥത്തിൽ വികാര ഭരിതവും പൊട്ടിത്തെറികൾ നിറഞ്ഞതുമായി.

രാവിലെ 11 മണിക്ക് മുഖ്യമന്ത്രിക്ക് മറുപടിയുണ്ടാകും എന്ന പ്രഖ്യാപനം ഇന്നലെ തന്നെ നടത്തിയ കെ സുധാകരൻ വിവാദങ്ങളുടെ ഓളം നിലനിർത്തുന്നതിൽ വിജയിച്ചു എന്ന് പറയാം.അദ്ദേഹത്തിന്റെ പ്രഖ്യാപനം മുതൽ ഇന്നത്തെ സസ്പെൻസ് പൊട്ടും വരെ രാഷ്ട്രീയ കേരളം ഉറ്റുനോക്കിയത് സുധാകരന്റെ വാക്കുകൾക്കായിരുന്നു.

എന്നാൽ 11 മണിക്ക് തുടങ്ങുമെന്ന് പറഞ്ഞ വാർത്താ സമ്മേളനം 20 മിനുട്ട് വൈകിയാണ് തുടങ്ങിയത്.വലിയ മാധ്യമപ്പട തന്നെ എത്തിയിരുന്നു. പത്ര സമ്മേളനം തുടങ്ങിയപ്പോൾ വളരെ മിതമായ ശൈലിയിൽ സംസാരം തുടങ്ങിയ സുധാകരൻ ഒരു മണിക്കൂർ കഴിയുമ്പോഴേക്കും കത്തിക്കയറാൻ തുടങ്ങിയിരുന്നു.

രാഷ്ട്രീയ കേരളത്തിലെ പുതിയ ചർച്ചകൾക്ക് വഴിയൊരുക്കിയ മുഖ്യമന്ത്രി പിണറായി വിജയൻറെ വെളിപ്പെടുത്തലുകൾക്ക് പിന്നാലെയുള്ള മറുപടിയിൽ സർവ മേഖലയിലും സ്പർശിച്ചു കൊണ്ടായിരുന്നു കെ പി സി സി അധ്യക്ഷൻ കെ സുധാകരൻ കൊച്ചിയിൽ മാധ്യമങ്ങളെ കണ്ടത്.വർഷങ്ങൾക്ക് മുൻപ് തന്റെ മക്കളെ തട്ടിക്കൊണ്ടുപോകാൻ കെ സുധാകരൻ പദ്ധതിയിട്ടിരുന്നു എന്ന് മുഖ്യമന്ത്രി വെള്ളിയാഴ്ച വെളിപ്പെടുത്തിയതിന് പിന്നാലെയാണ് കെ സുധാകരൻ പൊട്ടിത്തെറിച്ചത്.

വിമർശനങ്ങൾക്ക് മാന്യമായ മറുപടിയുണ്ടെന്നും പൊളിറ്റിക്കൽ ക്രിമിനലിന്റെ ശൈലിയിൽ പിണറായി വിജയന് മറുപടി പറയാൻ തന്റെ കസേരയിൽ ഇരുന്നുകൊണ്ട് കഴിയില്ലെന്നും പറഞ്ഞാണ് കെ സുധാകരൻ തുടങ്ങിയത്.

മുഖ്യമന്ത്രി പിണറായി വിജയന് നട്ടെല്ലുണ്ടെങ്കിൽ ആരോപണങ്ങളിൽ തനിക്കെതിരെ നടപടിയെടുത്ത് കാണിക്കട്ടെയെന്നും കെ സുധാകരൻ വെല്ലുവിളിച്ചു. പിണറായി വിജയനെ ചവിട്ടി എന്ന് പറഞ്ഞ് വലിയ ആളാകേണ്ട കാര്യം തനിക്കില്ല.ഓഫ് റെക്കോർഡ് ആയി പറഞ്ഞ കാര്യം വർത്തയാക്കുകയായിരുന്നു എന്നും പറഞ്ഞു.മുഖ്യമന്ത്രി എന്ന നിലയിൽ പിണറായി വിജയനെ തനിക്ക് ബഹുമാനമാണെന്നും പല സന്ദർഭങ്ങളിലും സുധാകരൻ പറയുന്നുണ്ടായിരുന്നു.

മുഖ്യമന്ത്രി ഉന്നയിച്ച ആരോപണങ്ങളെ ഒന്നൊന്നായി തള്ളിപ്പറഞ്ഞ സുധാകരൻ വാർത്താ സമ്മേളനത്തിന്റെ ഒടുവിൽ മാധ്യമങ്ങളുടെ പ്രകോപനപരമായ ചോദ്യങ്ങൾക്ക് മുൻപിലാണ് പൊട്ടിത്തെറിക്കാൻ തുടങ്ങിയത്.

വികാരഭരിതനായി കണ്ണൂർ ജില്ലയിൽ കോൺഗ്രെസ്സുകാർ സി പി എമ്മിൽ നിന്നും നേരിടുന്ന ആക്രമണങ്ങളെ അതി ജീവിച്ചതിന്റെ കഥകൾ പറയുമ്പോൾ സുധാകരൻ പൊട്ടിത്തെറിച്ചു.13 കൊല്ലം പാർട്ടി പ്രവർത്തകർ തന്റെ വീടിന് കാവൽ നിന്നാണ് താൻ ഉറങ്ങിയതെന്നും മുന്നിലും പിന്നിലും പാർട്ടിക്കാർ കാവൽ നിന്നാണ് തന്നെ സംരക്ഷിച്ചതെന്നും ഒരുവേള സുധാകരൻ പറഞ്ഞു.അത്തരത്തിലുള്ള ഗതികേടൊന്നും ഒരു സി പി എം കാരനും പാർട്ടി പ്രവർത്തനം നടത്താൻ നേരിട്ടില്ല എന്നും സുധാകരൻ വ്യക്തമാക്കി.

മാധ്യമങ്ങളിൽ നിന്നും തുരുതുരാ ചോദ്യ വർഷങ്ങൾ തനിക്കെതിരെ വന്നപ്പോൾ സുധാകരൻ വീണ്ടും പൊട്ടിത്തെറിച്ചു.എ കെ ജി സെന്ററിൽ നിന്നും വാട്സാപ്പിൽ വരുന്ന ചോദ്യങ്ങൾ ചോദിച്ചല്ല പത്ര പ്രവർത്തനം നടത്തേണ്ടതെന്നും സ്വന്തമായി എന്തെങ്കിലും ചോദിക്കാനുണ്ടെങ്കിൽ ചോദിച്ചാൽ മറുപടി തരാമെന്നും പറഞ്ഞു.കൂടുതൽ ക്യാപ്സ്യൂൾ ചോദ്യങ്ങൾക്ക് ചെവി കൊടുക്കാതെ തന്റെ വാർത്താ സമ്മേളനം കഴിഞ്ഞു എന്ന് പ്രഖ്യാപിച്ച് സുധാകരൻ അവസാനിപ്പിക്കുകയായിരുന്നു.