breaking news

മലയാളി പ്രവാസികളും ജാഗ്രതൈ; കുവൈത്തില്‍ മാസ്‌ക് ധരിക്കാത്തവര്‍ക്കെതിരെ ശക്തമായ നടപടികള്‍ ആരംഭിച്ചു

കുവൈത്ത് : കുവൈത്തില്‍ ഫേസ് മാസ്‌ക് ധരിക്കാത്തവര്‍ക്കെതിരെ ശക്തമായ നടപടികള്‍ ആരംഭിച്ചു. കൊറോണ വൈറസ് വ്യാപനം തടയുന്നതിന്റെ ഭാഗമായി ആരോഗ്യ സുരക്ഷാ മാര്‍ഗ്ഗ നിര്‍ദ്ദേശങ്ങള്‍ നടപ്പിലാക്കുന്നതിനു മന്ത്രി സഭ രൂപീകരിച്ച സമിതിയുടെ നേതൃത്വത്തിലാണു രാജ്യത്തെ വാണിജ്യ കേന്ദ്രങ്ങളിലും കടകളിലും പ്രചാരണ പ്രവര്‍ത്തനങ്ങള്‍ ശക്തമാക്കിയിരിക്കുന്നത്. സ്ഥാപനങ്ങളിലെ ജീവനക്കാരും ഉപഭോക്താക്കളും മുഖാവരണവും കയ്യുറകളും ധരിക്കുന്നുവെന്ന് ഉറപ്പ് വരുത്തുന്നതിനായി പ്രത്യേക സംഘം നിരീക്ഷണം ആരംഭിച്ചു കഴിഞ്ഞു.

കൊറോണ വൈറസ് പശ്ചാത്തലത്തില്‍ ഏര്‍പ്പെടുത്തിയ നിയന്ത്രണങ്ങള്‍ നീക്കി രാജ്യത്തെ ജന ജീവിതം പുന സ്ഥാപിക്കുന്നതിന്റെ നാലാം ഘട്ടത്തില്‍, ആറ് ഗവര്‍ണറേറ്റുകളിലെ, വാണിജ്യ സമുച്ചയങ്ങള്‍ക്കകത്തും പുറത്തുമുള്ള കടകളില്‍ നടത്തിയ പരിശോധനയില്‍ തൊഴിലാളികളും ഉപഭോക്താക്കളും അടക്കം നിരവധി പേരെയാണു മാസ്‌കുകളോ കയ്യുറകളോ ധരിക്കാതെ കണ്ടെത്തിയത്. സ്ഥാപനത്തിലെ ജീവനക്കാരും ഉപഭോക്താവും മാസ്‌ക് ധരിക്കാത്ത നിലയില്‍ പിടിയിലായാല്‍ സ്ഥാപന ഉടമക്കായിരിക്കും അതിന്റെ പൂര്‍ണ്ണ ഉത്തരവാദിത്തം.

അതേ സമയം സ്ഥാപനത്തിലെ ജീവനക്കാരന്‍ മാസ്‌കോ കയ്യുറകളോ ധരിച്ചില്ലെങ്കില്‍, ജീവനക്കാരന്റെ പേരില്‍ മാത്രമായിരിക്കും പിഴ ചുമത്തുക. എന്നാല്‍ ജീവനക്കാരനും ഉപഭോക്താവും ഒരെ സമയം മാസ്‌ക് ധരിക്കാത്തെ പിടിയിലായാല്‍ സ്ഥാപനം അടച്ചു പൂട്ടുന്നതായിരിക്കും.ഇത്തരത്തില്‍ 350 ലംഘനങ്ങളാണു ഫാര്‍വാനിയ ഗവര്‍ണ്ണറേറ്റില്‍ നിന്ന് മാത്രമായി രേഖപ്പെടുത്തിയത്. ഇതു കൂടാതെ മുബാറക് അല്‍ കബീര്‍ ഗവര്‍ണറേറ്റില്‍ 20 ഉം ജഹ്റയില്‍ 15 ഉം ഹവല്ലിയില്‍ 10 ഉം നിയമ ലംഘനം രേഖപ്പെടുത്തിയിട്ടുണ്ട്.

വാണിജ്യ കേന്ദ്രത്തിന് പുറത്തോ പൊതുസ്ഥലങ്ങളിലോ മാസ്‌ക് ധരിക്കാത്തവര്‍ക്ക് 100 ദിനാര്‍ പിഴ ചുമത്തുമെന്നും സമിതിയിലെ ഉദ്യോഗസ്ഥര്‍ വ്യക്തമാക്കി. വാണിജ്യ മന്ത്രാലയം, കുവൈറ്റ് മുനിസിപ്പാലിറ്റി, വ്യവസായം , മാന്‍പവര്‍ അതോറിറ്റി എന്നീ വിഭാഗങ്ങളിലെ ജുഡീഷ്യല്‍ ഓഫീസര്‍മാര്‍ക്കും ആരോഗ്യ മന്ത്രാലയത്തിന്റെ പിന്തുണയോടെ പൊതു സ്ഥലങ്ങളില്‍ ഫേസ് മാസ്‌ക് ധരിക്കാത്തവര്‍ക്കെതിരെ നടപടി എടുക്കാന്‍ അധികാരം ഉണ്ടായിരിക്കുന്നതാണു.