breaking news

വിജയോത്സവ ദിന കോവിഡ് പ്രോട്ടോകോൾ പാലനം:മട്ടന്നൂർ ഹയർ സെക്കന്ററി സ്കൂൾ മാതൃകയായി

photo | c sujith kumar

മട്ടന്നൂർ: ഒരാളെ പോലും മാസ്ക് താഴ്ത്തിയിട്ട് കണ്ടില്ല.ഒരാൾപോലും ഇടയ്ക്കിടെ മാസ്കിൽ തൊട്ടില്ല.ഒരാൾ പോലും അണുനശീകരണം വരുത്തി എന്നുറപ്പില്ലാതെ സദസ്സിൽ ഇരുന്നില്ല.
മാസ്ക് ശരിയായ രീതിയിൽ ധരിക്കാതെയും അണു നശീകരണം വരുത്താതെയും കോവിഡ് മാനദണ്ഡങ്ങളെ അലക്ഷ്യമായി കൈകാര്യം ചെയ്യുന്നവർക്കുള്ള ചുട്ട മറുപടിയായി മട്ടന്നൂർ ഹയർ സെക്കന്ററി സ്കൂൾ പ്രതിഭകളെ ആദരിക്കാനായി നടത്തിയ വിജയോത്സവം പരിപാടി. ഒരു ശതമാനംപോലും പിഴവില്ലാതെ കോവിഡ് മാനദണ്ഡങ്ങൾ പാലിച്ചു എന്നതായിരുന്നു പരിപാടിയിലെ ഹൈ ലൈറ്റ്.
കോവിഡ് മാനദണ്ഡങ്ങൾ പാലിക്കാനായി ഇവിടെ ഒരു കമ്മറ്റി തന്നെ പ്രവർത്തിച്ചു എന്ന് പറഞ്ഞാൽ ഒരുപക്ഷെ അവിശ്വസനീയമായി തോന്നാം.എന്നാൽ അതും ഇവിടെ സംഭവിച്ചു!

സ്കൂൾ ഗേറ്റിൽ പ്രത്യേകം സ്ഥാപിച്ച കൌണ്ടർ എത്തുന്നതിന് മുൻപേ കൈകൾ സാനിറ്റൈസ് ചെയ്യാനുള്ള സൗകര്യം ഒരുക്കിയിരുന്നു. കൗണ്ടറിൽ വിവര ശേഖരണവും തെർമൽ സ്‌ക്രീനിങ്ങും കഴിഞ്ഞാണ് മുഴുവൻ ആളുകളെയും പരിപാടി നടക്കുന്ന സദസ്സിലേക്ക് കടത്തി വിട്ടത്.കയ്യുറകളും നൽകി. സ്കൂളിലെ ബോധി വൃക്ഷ ചുവട്ടിൽ സാനിറ്റൈസ് ചെയ്യാനുള്ള രണ്ട് കൗണ്ടറുകൾ കൂടി ഉണ്ടായിരുന്നു.
സദസ്സിലും വേദിയിലും ഇരിക്കുന്ന ഓരോ ആളുകളും മാസ്ക് ശരിയായ രീതിയിൽ ധരിക്കുന്നു എന്ന് സംഘാടകർ ഉറപ്പുവരുത്തിയതും ഇതിനായുള്ള പ്രത്യേകം അനൗൺസ്‌മെന്റും ശ്രദ്ധേയമായി.
എസ് എസ് എൽ സി, പ്ലസ് ടു പരീക്ഷകളിൽ മികച്ച വിജയം നേടിയവർക്ക് പുറമെ വിവിധ മേഖലകളിൽ വിജയം കൊയ്ത പ്രതിഭകളെയും ആദരിച്ച ചടങ്ങ് കണ്ണൂർ ജില്ലാ പഞ്ചായത്ത് പ്രസിഡണ്ട് പി പി ദിവ്യയാണ് ഉൽഘാടനം ചെയ്തത്.