breaking news

ദുബായിയിലേക്കുള്ള യാത്രക്കാര്‍ ശ്രദ്ധിക്കുക;മുന്‍‌കൂര്‍ അനുമതി നിര്‍ബന്ധം

യാത്രാനുമതി കര്‍ശനമാക്കി അധികൃതര്‍. മറ്റു എമിറേറ്റുകളില്‍ നിന്നും ദുബായിയില്‍ എത്തുന്നവര്‍ ഫെഡറല്‍ അതോറിറ്റി ഫോര്‍ ഐഡന്റിറ്റി ആന്‍ഡ് സിറ്റിസണ്‍ഷിപ്പില്‍ നിന്നും, ദുബായ് വിസക്കാര്‍ ദുബായ് എമിഗ്രെഷനില്‍ നിന്നും നിര്‍ബന്ധമായും അനുമതി നേടിയിരിക്കണം. അനുമതി ലഭിക്കാനായി ഇരുവകുപ്പുകളുടെയും വെബ്സൈറ്റുകള്‍ സന്ദര്‍ശിക്കാം.

പെട്ടെന്നുണ്ടായ സാഹചര്യത്തില്‍ ഈ വിവരം അറിയാതെ എത്തി വിമാനത്താവളത്തില്‍ കുടുങ്ങിയ 300 യാത്രക്കാര്‍ക്ക് രാജ്യത്തേക്ക് കടക്കാന്‍ അനുമതി ലഭിച്ചിട്ടുണ്ട്. ഇതില്‍ മലയാളികളും ഉള്‍പ്പെടും. ഇവരുടെ രേഖകള്‍ പരിശോധിക്കാന്‍ ദുബായ് ജനറല്‍ ഡയറക്ടറേറ്റ് ഓഫ് റസിഡന്‍സി ആന്‍ഡ് ഫോറിന്‍ അഫയേഴ്‌സ് പ്രത്യേക സംഘം വിമാനത്താവളത്തിലെത്തി. താമസ വിസക്കാര്‍ യു.എ.ഇ.യിലേക്ക് വരാന്‍ അനുമതി നേടണമെന്ന നിയമം മുന്‍പ് ഉപേക്ഷിച്ചിരുന്നു.

കോവിഡ് സാഹചര്യത്തില്‍ വിസ സാഹചര്യങ്ങള്‍ എപ്പോള്‍ വേണമെങ്കിലും മാറാന്‍ സാധ്യതയുള്ളതിനാല്‍ ടോള്‍ ഫ്രീ നമ്ബറില്‍ ബന്ധപ്പെടണമെന്ന് ജിഡിആര്‍എഫ്എ തലവന്‍ മേജര്‍ ജനറല്‍ മുഹമ്മദ് അഹ്‌മദ് അല്‍ മറി അറിയിച്ചു. വിസയുമായി ബന്ധപ്പെട്ടുള്ള നിയമങ്ങള്‍ അറിയാന്‍ 8005111 എന്ന ടോള്‍ഫ്രീ നമ്ബറില്‍ ബന്ധപ്പെടാം. വിദേശ രാജ്യങ്ങളില്‍ നിന്നുള്ളവര്‍ 00971 4313999 എന്ന നമ്ബറിലേക്ക് വിളിക്കാം. ഇതിനു പുറമെ amer@dnrd.ae എന്ന ഇ-മെയില്‍ വിലാസത്തിലൂടെയും വെബ്സൈറ്റിലെ ചാറ്റ് ബോക്‌സിലൂടെയും പുതിയ വിവരങ്ങള്‍ അറിയാന്‍ സൗകര്യമുണ്ട്.