breaking news

റോഡ്പണിയിലെ അപാകം: കോളാരി വില്ലേജ് ഓഫീസിൽ വെള്ളം കയറി മതിൽ തകർന്നു

| കോളാരി വില്ലേജ് ഓഫീസ് പരിസരത്ത് വെള്ളം കയറി മതിൽക്കെട്ട് തകർത്ത് ഒഴുകുന്നു | photo jginews

മട്ടന്നൂർ: റോഡ് പണിയിലെ അപാകവും അശാസ്ത്രീയമായ ഓവുചാൽ നിർമ്മാണവും കാരണം ഇന്നലെ പെയ്ത കനത്ത മഴയിൽ മട്ടന്നൂർ കണ്ണൂർ റോഡിലെ കോളാരി വില്ലേജ് ഓഫീസിൽ വെള്ളം കയറി.

ഒരു മണിക്കൂറോളം പെയ്ത മഴയിൽ റോഡിൽ നിന്നൊഴുകിവന്ന വലിയ വെള്ളക്കെട്ട് വില്ലേജ് ഓഫീസിന്റെ വാതിൽപ്പടിവരെയെത്തി. മഴ തുടരുന്നതിനിടെ വെള്ളം കയറിയത് വില്ലേജ് ഓഫീസ് ജീവനക്കാരിൽ പരിഭ്രാന്തി പരത്തി.

വെള്ളം ഉയരാൻ തുടങ്ങിയതോടെ ജീവനക്കാർ തഹസിൽദാറെ വിവരമറിയിച്ചു.എന്നാൽ ഇതിനിടയിൽ കുത്തിയൊലിച്ച് വില്ലേജ് ഓഫീസിന്റെ പിന്നിലേക്ക് ഒഴുകിയ വെള്ളത്തിന്റെ ശക്തിയിൽ പിന്നിലെ മതിൽ തകർന്നതോടെ ഒഴുകി പോവുകയായിരുന്നു. വെള്ളക്കെട്ട് പൂർണമായും ഒഴിയുകിപ്പോയതിന് ശേഷം മാത്രമാണ് ജീവനക്കാർ പോയത്.

മട്ടന്നൂർ കണ്ണൂർ കെ എസ് ടി പി റോഡ് പണിയിലെ അപാകവും ഓവുചാൽ നിർമ്മാണത്തിലെ അശാസ്ത്രീയതയുമാണ് വില്ലേജ് ഓഫീസിലേക്ക് വെള്ളം കയറാൻ ഇടയാക്കിയത്.

മട്ടന്നൂർ കണ്ണൂർ റോഡിൽ കോളേജ് റോഡ് ഭാഗത്ത് റോഡ് ഉയർന്നിട്ടാണ്.മഴ കനത്തു പെയ്യുമ്പോൾ ഈ മേഖലയിൽനിന്നുള്ള മുഴുവൻ വെള്ളവും വാഴാന്തോട് ഭാഗത്തേക്കാണ് ഒഴുകുക.എന്നാൽ കെ എസ് ടി പി റോഡ് നവീകരിക്കുന്നതിനിടയിൽ കണ്ണൂർ റോഡിൽ എൽ ഐ സി ഓഫീസിന് സമീപത്ത് റോഡ് അനാവശ്യമായി ഉയർത്തിയത് കാരണമാണ് ഇടയിലുള്ള പ്രദേശങ്ങളിൽ വെള്ളം കയറിയത്.

ഓവ് ചാലിലേക്ക് വെള്ളം ഒഴുകിപ്പോകാത്തതും വില്ലേജ് ഓഫീസ് ഉൾപ്പെടുന്ന പ്രദേശങ്ങളിൽ വെള്ളം കയറാനിടയാകുന്നു.
ഇതുസംബന്ധിച്ച് തഹസിൽദാർക്ക് പരാതി നൽകുമെന്ന് കോളാരി വില്ലജ് ഓഫീസർ അറിയിച്ചു.