breaking news

ഒളിമ്പിക്സ് ഉദ്‌ഘാടന ചടങ്ങിൽ പാക് താരങ്ങൾ കോവിഡ് ചട്ടങ്ങൾ ലംഘിച്ചു:നടപടിയെടുത്തേക്കും

OLYMPICS DESK |

ടോക്യോ: ഒളിമ്പിക്സ് ഉദ്‌ഘാടന ചടങ്ങിൽ പാക് താരങ്ങൾ കോവിഡ് പ്രോട്ടോകോൾ ലംഘിച്ച് പതാകയേന്തിയത് വിവാദത്തിലേക്ക്.

ലോകം ഉറ്റുനോക്കുന്ന കായിക മാമാങ്കം കോവിഡ് ഭീഷണിയിലാണ് ടോക്യോയിൽ അരങ്ങേറുന്നത്.ഇത്തരം സാഹചര്യത്തിൽ കോവിഡ് മാനദണ്ഡങ്ങൾ കർശനമായി പാലിക്കാൻ താരങ്ങൾക്ക് നിർദേശം ഉണ്ടായിട്ടും ലംഘിച്ചതാണ് വിവാദമായത്.വിഷയത്തിൽ അന്താരാഷ്ട്ര ഒളിമ്പിക് അസോസിയേഷൻ നടപടിയെടുത്തേക്കും എന്നാണ് സൂചന.

ടോക്യോ നാഷണൽ സ്റ്റേഡിയത്തിൽ നടന്ന ഓപ്പണിങ് സെറിമണിയിൽ മഹൂർ ഷഹ്സാദ്,ഖലീൽ അക്തർ എന്നി പാക് താരങ്ങളാണ് കോവിഡ് മാനദണ്ഡങ്ങൾ ലംഘിച്ചത്.പാകിസ്ഥാൻ പതാകയേന്തിയ കായിക താരങ്ങൾ മാസ്ക് ധരിച്ചിരുന്നില്ല എന്നാണ് കണ്ടെത്തൽ.

പാക് ബാഡ്മിന്റൺ കളിക്കാരൻ മാഹൂർ ഷഹ്സാദ് താടിയിലും ഷൂട്ടിംഗ് തരാം ഖലീൽ അക്തർ മൂക്കിന് താഴെയും ആയിരുന്നു മാസ്ക് അണിഞ്ഞത്.ഉദ്‌ഘാടന വേളയിൽ കിർഗിസ്ഥാൻ,താജികിസ്താൻ താരങ്ങളും മാസ്ക് അണിഞ്ഞില്ല എന്ന് പരാതിയുണ്ട്.

ടോക്യോ 2020 പ്ലേ ബുക്കിൽ സന്നദ്ധ സേവകരും കളിക്കാരും ഒഫീഷ്യൽസും മുഴുവൻ സമയവും മാസ്ക് ധരിക്കണമെന്ന് നിബന്ധനയുണ്ട്.സാമൂഹ്യ അകലം പാലിച്ചായിരിക്കും മെഡലുകൾ നൽകുക.വിജയികളുടെ ഗ്രൂപ് ഫോട്ടോ സെഷൻ ഉണ്ടായിരിക്കില്ല.

നിരവധി വിദേശ താരങ്ങളും ഒഫീഷ്യലുകളും ഒളിമ്പിക് വില്ലേജിൽ നിരീക്ഷണത്തിലാണ്.