breaking news

പ്രാദേശിക വനവൽക്കരണത്തിനും പ്രസക്തിയേറുന്നു : മന്ത്രി എം വി ഗോവിന്ദൻ

കാടുണ്ടാക്കാൻ തയ്യാറുണ്ടോ…. ചലഞ്ച്‌ ഏറ്റെടുക്കൂ…

കണ്ണൂർ: വനവൽക്കരണം എന്നത് പ്രാദേശിക തലത്തിലും വീട്ടുപറമ്പിൽപോലും ആകാമെന്ന് മന്ത്രി എം വി ഗോവിന്ദൻ പറഞ്ഞു.

സംസ്ഥാനത്തെ ആദ്യത്തെ കാർബൺ ന്യൂട്രൽ ജില്ലയാകാനുള്ള ഒരുക്കത്തിന്റെ ഭാഗമായി കണ്ണൂർ ജില്ലാ പഞ്ചായത്ത് പ്രഖ്യാപിച്ച ലിറ്റിൽ ഫോറസ്റ്റ് ചലഞ്ച് പ്രഖ്യാപന ചടങ്ങിൽ സംസാരിക്കുകയായി രുന്നു അദ്ദേഹം.

നാട്ടിൻപുറത്ത് ഒരു കാലത്ത് സുപരിചിതമായിരുന്ന കാവുകൾ പോലും ഇല്ലാതായിക്കൊണ്ടിരിക്കുന്നു.അവിടെയാണ് പ്രാദേശികമായ വനവൽക്കരണത്തിന് പ്രസക്തി ഉണ്ടാകുന്നത്.

സംസ്ഥാനതലത്തിൽ തന്നെ നടപ്പാക്കേണ്ട ഒരു പദ്ധതിയാണ് കണ്ണൂർ ജില്ലയിൽ ജില്ലാ പഞ്ചായത്ത് ഏറ്റെടുത്ത് നടപ്പാക്കുന്നതെന്നത് ശ്രദ്ധേയമാണെന്ന് മന്ത്രി എം വി ഗോവിന്ദൻ പറഞ്ഞു.

രണ്ട് സെന്റ് സ്ഥലത്ത് 400 മരങ്ങൾ വരെ വെച്ചു പിടിപ്പിക്കാൻ പറ്റുമെന്നാണ് ശാസ്ത്രീയമായ കണക്ക്.റോഡും പാലവും കെട്ടിടങ്ങളും നിർമ്മിച്ചുള്ള വികസനം മാത്രമല്ല ലക്ഷ്യമെന്നാണ് കണ്ണൂർ ജില്ലാ പഞ്ചായത്തിന്റെ നൂതനമായ ആശയം ലക്ഷ്യമിടുന്നത്.

വരും തലമുറയ്ക്ക് ജീവിക്കാനാവശ്യമായ ജൈവ സമ്പത്ത് ഉണ്ടാക്കുക കൂടിയാണ് കാടുണ്ടാക്കൽ ചലഞ്ചിന്റെ ഭാഗമായി കണ്ണൂർ ജില്ലാ പഞ്ചായത്ത് ലക്ഷ്യമിടുന്നത്.ഈ വർഷം ചുരുങ്ങിയത് 100 വനങ്ങൾ ഉണ്ടാക്കും.

വനങ്ങൾ മികച്ച രീതിയിൽ പരിപാലിക്കുന്നവർക്ക് ജില്ലാ പഞ്ചായത്തു വക പ്രത്യേക പുരസ്കാരവും നൽകും.വൃക്ഷ തൈകൾ ജില്ലാ പഞ്ചായത്ത് സൗജന്യമായി നൽകും .

മരങ്ങളെ പരിപാലിക്കാനുള്ള മനസാണ് പ്രധാനമെന്ന് ജില്ലാ പഞ്ചായത്ത് പ്രസിഡണ്ട് പി പി ദിവ്യ പറഞ്ഞു. ചലഞ്ചിൽ പങ്കെടുക്കുന്നവർക്കായുള്ള ഉപദേശങ്ങളും നിർദേശങ്ങളും വിദഗ്ധർ നൽകും.വിളിക്കേണ്ട നമ്പർ 94000 64876 .