breaking news

ഫേസ്ബുക്കിന്റെ പേര് മാറുന്നു: അടിമുടി മാറ്റങ്ങളെന്ന് സൂചന

ന്യൂയോർക്ക് : സാമൂഹിക മാധ്യമങ്ങളിൽ ജനകീയനായ ഫേസ്ബുക് അമ്പരപ്പിക്കുന്ന മാറ്റങ്ങൾക്ക് ഒരുങ്ങുന്നു.

ഇസ്റ്റാഗ്രാം ,വാട്സ്ആപ് എന്നിവയുടെ ഉടമസ്ഥത കൂടിയുള്ള മാതൃ കമ്പനി അതിന്റെ ബ്രാൻഡ് നെയിം വരെ മാറ്റി അടിമുടി മാറ്റങ്ങൾക്ക് ഒരുങ്ങുന്നു എന്നാണ് ഐ ടി ലോകത്തുനിന്നുവരുന്ന വാർത്തകൾ.

കേവലം സമൂഹ മാധ്യമ കമ്പനി എന്നതിലുപരി പ്രവർത്തന മേഖല വ്യാപിക്കാനാണ് കമ്പനി ഉദ്ദേശിക്കുന്നത്.ഒക്ടോബർ 28ന് നടക്കുന്ന ഫേസ്ബുക് വാർഷിക കണക്ട് കോൺഫ്രൻസിൽ മാർക്ക് സക്കർബർഗ് ഫേസ്ബുക്കിന്റെ പുതിയ പേര് പ്രഖ്യാപിക്കും എന്നാണ് സൂചന.

അമേരിക്കയിലെ പ്രമുഖ ടെക്നോളജി ബ്ലോഗായ വെർജാണ് ഇക്കാര്യം റിപ്പോർട്ട് ചെയ്തത്.എന്നാൽ ഫേസ്ബുക് സോഷ്യൽ മീഡിയ നിലവിലുള്ളതുപോലെ തന്നെ തുടരും.ബ്രാൻഡ് നെയിം മാറുന്നതോടെ സ്മാർട്ട് ഫോൺ അടക്കമുള്ള ഡിജിറ്റൽ ഉപകരണങ്ങളുടെ നിർമ്മാണത്തിലേക്കും കമ്പനി കടന്നേക്കും.

സക്കർബർഗ് ഇത്തരത്തിൽ വൈവിധ്യ വൽക്കരണം ആഗ്രഹിക്കുന്നതിന്റെ ഭാഗമായി അടുത്തിടെ റെയ്ബാനുമായി ചേർന്ന് ചില ഉത്പന്നങ്ങൾ ഇറക്കിയിരുന്നു.എന്നാൽ പേര് മാറ്റം സംബന്ധിച്ച് ഫേസ്ബുക് ഔദ്യോഗിക പ്രതികരണം നടത്തിയിട്ടില്ല.